Huawei kompaniyasi raqiblaridan farqli ravishda aqlli avtoyo’llar prototipini yaratdi. Bu haqda Bloomberg xabar beradi.
Aqlli yo’llar ustunlar, yo’l ishoralari, svetoforlarga o’rnatiladigan datchiklar, radarlar hamda kameralar tizimi bo’lib, barcha ma’lumotlarning yagona tarmoqqa jo’natilishini ta’minlaydi.
Ushbu transportni boshqarish tarmog’i yo’lda sodir bo’ladigan barcha narsalar uchun javobgardir — ammo hozircha faqat sinov maydonida. Huawei tarmoqda doimiy ravishda oladigan ma’lumotlarga asoslanib, oldinga va orqaga harakatlanadigan, to’xtab turadigan, to’siqlardan qochadigan, tezlashadigan va sekinlashadigan aqlli avtobusni sinovdan o’tkazmoqda. Huawei sinov maydonchasi Shanxay yaqinidagi Usi shahrida joylashgan.
“Avtonom haydash — bu amalga oshirish qiyin bo’lgan tendensiya, ammo izolyatsiya qilingan transport vositasi bunga dosh berolmaydi. Yagona yechim — yo’ldan ko’proq ma’lumot olish. Yo’llar ular bo’ylab harakatlanadigan transport vositasiga xizmat qilishi kerak “, dedi Huawei Axborot-kommunikatsiya texnologiyalari kompaniyasi prezidenti Dzyan Vangcheng.
Huawei kompaniyasi shunchaki haydovchisiz avtomobillar ishlab chiqarish emas, balki ular uchun aloqa uskunalari va dasturiy ta’minot yetkazib berishga qaror qildi. Bu g’oyalar yaratilishini AQSH sanksiyalariga qarshi kurash sifatida qabul qilish mumkin.
Energiyaning yangi turlari bo’yicha avtoulovlar sektorini rivojlantirish rejalariga ko’ra, 2025-yilga kelib mamlakatda hech bo’lmaganda qisman avtomatizatsiyaga ega aqlli avtomobillar yangi sotilayotgan avtomobillarning 50 foizidan ortig’ini tashkil qilishi kerak. Shu bilan birga, rasmiylar avtoulovlarning Internetga va bir-biriga ulanishiga imkon beradigan infratuzilmani yaratish zarurligini ta’kidladilar.
