10-may kuni Innovatsion rivojlanish vaziri Ibrohim Abdurahmonov hamda Germaniya xalqaro hamkorlik jamiyati (GIZ) direktori Yorg Pudelka 250 ming Yevro qiymatidagi “Zamonaviy innovatsion markazlar — 2022” texnik yordam loyihasini amalga oshirish toʻgʻrisida Memorandum imzoladilar. Bu haqda Innovatsion rivojlanish vazirligi xabar bermoqda.

Xabarda aytilishicha, loyiha 3 ta asosiy komponentdan iborat boʻlib, u ilgʻor Germaniya tajribasiga tayangan holda innovatsion markazlar xodimlari va innovatsion tizimning asosiy ishtirokchilarining stajirovkalarini tashkil etish, aholining innovatsiyalar toʻgʻrisida xabardorligini oshirishni oʻz ichiga oladi.

Memorandum doirasida Xalqaro hamkorlik boʻyicha Germaniya jamiyatining (GIZ) begʻaraz grantlari asosida 15 nafar oʻzbekistonlik innovatsiya sohasidagi mutaxassislar Germaniyaga malaka oshirishga yuboriladi, xalqaro ekspertlar yordamida “Innovatsion markazlarni boshqarish toʻgʻrisida"gi qoʻllanma ishlab chiqiladi.

Shuningdek, Germaniyaning innovatsiya sohasi toʻgʻrisidagi litsenziyalangan hujjatli filmlar mamlakatimiz teleradiokanallari orqali keng jamoatchilikka taqdim etiladi.

"Spot.uz"da reklama