O‘zbekistonda “Andijon muzqaymoqlari” nomi ostidagi mahsulot patentlandi.
Qayd etilishicha, sohada 15 yillik tajribasi bor tadbirkor Hikmatulloh Madrahimov “Andijon muzqaymoqlari"ni tayyorlashni 5 yil avval boshlagan. Muzqaymoq mashhur bo‘lgach, uni uy sharoitida tayyorlab, sotadiganlar ham paydo bo‘la boshlagan.
“Tadbirkorlik ro‘yxatida yo‘q odamlar ham uy sharoitida qo‘lbola ravishda ishlab chiqarib sotyapti. Reydlarda tushgan „Andijon muzqaymoqlari“ deya sotilgan muzqaymoqlar orasida bizning mahsulotlar yo‘q edi”, — deydi “Andijon muzqaymoqlari” rahbari Hikmatulloh Madrahimov
Qo‘lbola usulda tayyorlanganlari ortib, hududlarda sanitar talablarga zid muzqaymoqlar ko‘paygach, tadbirkor asl muzqaymoq ishlab chiqarishni to‘xtatdi. Biroq sotuvchilar o‘zi tayyorlagan mahsulotni shu nom bilan sotishda davom etdi.
Hikmatulloh Madrahimov “Andijon muzqaymoqlari"ni patentladi. Endi uni qalbakisidan ajratib olsa bo‘ladi. Ma’lum qilinishicha, Toshkentga maxsus aravachalardan 40 dona yuborish rejalashtirilgan.
Avvalroq Spot, biznesni qonuniylashtirish yuzasidan tadbirkor Intellektual mulk agentligiga ariza topshirganligi haqida ma’lumot berilgan edi. Brend 10-iyundan boshlab rasmiy kuchga kirgan va 2031-yilgacha amal qiladi.
