Iqtisodiy tadqiqotlar va islohotlar markazi Toshkent shahri va viloyatlar markazlari kesimidagi oʻrtacha uy-joy narxlari asosida ikkilamchi bozorda uy-joy xarid qilish uchun ipoteka krediti olishga (subsidiyasiz) layoqatli aholi ulushini hisoblab chiqdi.
Uy-joy xarid qilishda ipoteka krediti olishga layoqatli aholi ulushini hisoblashda 62 kv.m maydonli uyni xarid qilishda oila daromadining ipoteka kreditiga yoʻnaltiradigan qismi 50% gacha, kredit muddati 20 yil va boshlangʻich toʻlov badali 30% deb hisoblangan.
Samarqandda (13%), Namangan (19%) viloyatlari va Toshkent (15%) shahrida uy-joy narxlarining balandligi tufayli ipoteka asosida uy-joy sotib olishga imkoniyati bor xonadonlar ulushi past.
Joriy narxlarni hisobga olganda Fargʻona (35%), Qoraqalpogʻiston (33%) va Navoiyda (32,9%) ipoteka shartlari asosida uy-joy xarid qilish imkoniyati boshqa hududlarga nisbatan yuqori.
Hisob-kitoblarga koʻra, respublika boʻyicha ipoteka krediti asosida uy-joy xarid qilishga layoqatli aholi ulushi 26% ni tashkil etmoqda.
Umuman olganda, 2021-yil yanvar-noyabr oylarida jismoniy shaxslarga ajratilgan ipoteka kreditlari hajmi 8 trln soʻmni tashkil etdi. Bunda, yangi tartib asosida ipoteka kreditlari orqali aholini uy-joy bilan taʼminlashga Moliya vazirligi tomonidan ajratilgan resurslar hajmi 3 barobarga oshib, 3,9 trln soʻmga yetdi (2020-yilda 1,3 trln soʻm).
Avvalroq Spot respublika boʻyicha ikkilamchi bozorda uy-joy narxlari oʻtgan oyga nisbatan oʻsganligi haqida yozgan edi.
