Shavkat Mirziyoyev 23-fevral kuni Moʻynoq shahriga yetib keldi va uning modernizatsiya qilingan aeroportini koʻzdan kechirdi, deb yozadi prezident matbuot xizmati.
Hukumatning 2019-yildagi qaroriga muvofiq, havo bandargohini rekonstruksiya qilish boshlandi. Soatiga 50 nafar yoʻlovchiga moʻljallangan yangi terminal qurildi. Uchish-qoʻnish yoʻlagi va perronlar taʼmirlandi.
Aeroport 1947-yilda qurilgan. Ilgari Toshkent, Nukus, Urganch, Qoʻngʻirot va boshqa shaharlarga qatnovlar shu yerdan amalga oshirilardi. Biroq 1990-yillardan 2020-yilgacha aeroport yoʻlovchi reyslari uchun foydalanilmagan.
2020-yilda aeroport deyarli 30 yil ichida birinchi yoʻlovchi samolyotini qabul qildi — bu sinov parvozi edi. “Birinchi raqamli samolyot” birinchi marta Moʻynoqqa yetib keldi.
Prezident mahalliy aholi, mahalla raislari va hokim oʻrinbosarlari bilan uchrashdi. Avvalgi tashrifi chogʻida “Madaniyat Moʻynoqdan boshlanadi” degan bayonotiga misol tariqasida yangi aeroportni koʻrsatdi.
Mirziyoyev Toshkent — Moʻynoq — Nukus yoʻnalishida havo qatnovini tashkil etish rejasini ham maʼlum qildi. Parvozlar yoʻlga qoʻyilishi bilan yuklarni yetkazib berish ham osonlashadi, dedi u.
Davlat rahbari mahalliy aholini kelgusi 2 yilga moʻljallangan rejalarni birgalikda belgilash maqsadida oʻz gʻoya va tashabbuslarini ilgari surishga taklif qildi. “Mehnatkash va tajribali” moʻynoqliklarning mehnat qilishi uchun sharoit zarur, deya taʼkidladi Prezident.
Yigʻilishda Toshkent viloyati tadbirkorlik subyektlari tomonidan Moʻynoqda amalga oshiriladigan loyihalar ham taqdim etildi. Poytaxt viloyati Moʻynoq viloyatini rivojlantirishni qoʻllab-quvvatlash maqsadida unga biriktirilgan.
Viloyatda xizmat koʻrsatish va servis sohasini rivojlantirish zarurligi — xususan, koʻngilochar sohaga soliq imtiyozlari berilishi koʻrsatib oʻtildi. Bu ichki turizmni rivojlantirish, ish oʻrinlari yaratishga xizmat qiladi.
Prezidentning Qoraqalpogʻistonga uch kunlik tashrifi Moʻynoqdan boshlandi.
2019-yil boshida investorlar Moʻynoqda kazino tashkil etishni taklif qilishgan. Bosh prokuratura tashabbusni amalga oshirish imkoniyatlarini oʻrganishni oʻz zimmasiga oldi, biroq oʻshandan beri ishning borishi haqida hech narsa maʼlum emas.
