Davlat soliq qoʻmitasi xabariga koʻra, uch oydan kamroq vaqt ichida 6000 nafar oʻzbekistonlik doʻkonlar chek bermagani va boshqa savdo qoidalari buzilgani haqida maʼlum qilgan.
Xususan, joriy yil 1-yanvaridan 19-martiga qadar “Soliq hamkor” ilovasi orqali 6017 nafar fuqaro tomonidan savdo va xizmat koʻrsatish qoidalarining buzilishi yuzasidan 22 111 ta murojaat kelib tushgan.
Murojaatlarning 13 670 tasida tekshiruvlar yakunlanib, 13411 tasida huquqbuzarliklar toʻliq tasdiqlandi hamda 3455 nafar fuqaroga 2 mlrd soʻmdan ortiq mukofot pullari toʻlab berildi.
Taʼkidlanishicha, murojaatlarning 6773 tasi takroriy kelib tushganligi sababli rad etilgan boʻlsa, 645 ta murojaat boʻyicha soliq tekshiruvlari, 1023 tasida oʻrganishlar oʻtkazilmoqda.
Murojaat oʻz tasdigʻini topganda huquqbuzarlardan jarima undirilgach, isteʼmolchilarga mukofot toʻlab beriladi.
Oʻtgan yilning oktyabr oyida prezident nazorat-kassa mashinalaridan foydalanishni takomillashtirish toʻgʻrisidagi qarorni imzolagan edi. U savdo va xizmat koʻrsatish sohasini soyadan chiqarish uchun moʻljallangan — soʻnggi hisob-kitoblarga koʻra, ayrim tarmoqlarda soya sektori 60% dan ortiqni egallaydi.
Unga koʻra, tovar va xizmatlarni kvitansiyasiz sotish, shuningdek, yorliqsiz yoki qalbaki yorliqlangan mahsulotlarni sotish toʻgʻrisida soliq organlariga murojaat qilganda arizachiga jarimaning 20%i miqdorida jarima undiriladi.
Hujjatda QR-kodni “Soliq” ilovasida roʻyxatdan oʻtkazish uchun chek summasining 1%i miqdorida keshbek ham nazarda tutilgan. Hujjat kuchga kirgan yangi yilning birinchi haftasida roʻyxatga olingan cheklar soni 43% ga oshdi.
