“Oʻzmetkombinat” aksiyadorlik jamiyati birjaga qoʻshimcha aksiyalar paketini joylashtirishga tayyorgarlik koʻrmoqda, bu haqda OʻzRTXB saytining tender boʻlimi maʼlum qilmoqda.
Kompaniya Toshkent fond birjasida navbatdagi ommaviy taklifni (FPO) oʻtkazishda yordam berish uchun anderrayter qidirmoqda. Hozirda zavod aksiyalarining 80,68%i davlatga tegishli.
Ilova qilingan hujjatlarga koʻra, “Oʻzmetkombinat” aksiyadorlik jamiyatining 5%igacha boʻlgan qismi FPO doirasida joylashtiriladi. Buni 2022-yil oxirigacha amalga oshirish rejalashtirilgan.
Qayd etilishicha, bu qadam 2021-yilning aprel oyida tasdiqlangan kapital bozorini rivojlantirish dasturiga mos keladi — bu zavodning IPOga chiqarilishini nazarda tutadi. Kompaniya, shuningdek, 2023−2025 yillarda aksiyalarni xalqaro joylashtirishni tashkil qilishni kutmoqda.
Ariza beruvchilar bir qator mezonlar boʻyicha baholanadi. Nomzodlar kapital bozorlarida, shu jumladan metallurgiya sohasida malaka va tajribaga ega boʻlishi kerak. Bundan tashqari, ular taklif hajmi va tuzilishi boʻyicha tavsiyalar berishlari, kutilayotgan talabni tahlil qilishlari va h.k.
Zavod boshlangʻich narxi $550 mingni taklif qildi. Xizmat koʻrsatish uchun ariza beruvchilardan arizalar 25-aprelgacha qabul qilinadi.
“Oʻzmetkombinat” aksiyadorlik jamiyatining 2021-yildagi sof foydasi salkam 1,5 trln soʻmni tashkil etib, oʻtgan yilga nisbatan 7 baravarga oʻsdi. Aksiyadorlar yigʻilishida kapitallashtirish uchun olingan foydani korxona ustav kapitaliga yoʻnaltirish toʻgʻrisida qaror qabul qilindi.
14-mart kuni fond birjasi zavod aksiyalari, 29-mart kuni esa imtiyozli qogʻozlar savdosini toʻxtatdi.
