Sport avvalroq 30 yillik tanaffusdan soʻng Dushanbe — Toshkent yoʻnalishi boʻyicha poyezdlar qatnovi tiklanishi haqida yozgan edi.
“Oʻzbekiston temir yoʻllari"ning xabar berishicha, mazkur yoʻnalishdagi ilk qatnov sanasi maʼlum.
Qayd etilishicha, 2022-yil 20-iyundan boshlab 301/302-sonli “Dushanbe — Toshkent — Dushanbe” yoʻnalishida yoʻlovchi poyezdi harakatlanishni boshlaydi.
Mazkur poyezd Dushanbedan haftaning dushanba kunlari joʻnab ketadi va seshanba kunlari soat 13:43da Toshkentga yetib keladi.
Toshkentdan haftaning har seshanba kuni soat 16:15da joʻnab ketib, Dushanbega chorshanba kuni yetib boradi.
Maʼlumot uchun, Toshkentdan Dushanbegacha temir yoʻl orqali boʻlgan masofa 916 km.ni tashkil etadi. Poyezd 21 soat davomida harakatlanadi.
301/302-sonli “Dushanbe — Toshkent — Dushanbe” yoʻnalishida yoʻlovchi poyezdi 10 ta vagondan: 4 kupe, 5 platskart va vagon-restorandan iborat.
Sotuv muddatiga qarab chegirmalarni hisobga olgan holda chipta narxi 381 476 soʻmdan boshlanadi. Сhiptalarini temir yoʻl kassalaridan yoki www.chipta.railway.uz, www.e-ticket.railway.uz saytlari orqali xarid qilish mumkin.
