“Forbes” jurnali AQShning 400 ta eng boy biznesmenlarini e’lon qildi. Unga ko‘ra Ilon Mask birinchi marta “Forbes USA” reytingida roʻyxatda birinchi oʻrinni egalladi.
Maskning boyligi ro‘yxatga kiritilgan vaqtda $251 mlrd.ga baholangan. Bu o‘tgan yilgidan ($190,5 mlrd) $60,5 mlrd.ga (32%) ko‘pdir.
Ilon Mask to‘rt yil davomida ro‘yxat yetakchisi bo‘lgan “Amazon” asoschisi Jeff Bezosni birinchi o‘rindan olib tashladi. Endi tadbirkor eng badavlat amerikaliklar ro‘yxatida ikkinchi o‘rinni egallab turibdi.
“Forbes USA” uning boyligini $151 mlrd.ga baholagan, bu o‘tgan yilgi reytingni tuzish paytidagidan ($201 mlrd) $50 mlrd (25%ga) kamdir.
Bezosning boyligi “Amazon” aksiyalari qiymatining 20%dan ko‘proqqa tushib ketgani tufayli kamaydi, deya tushuntirish berdi “Forbes”.
Amerikaning eng boy 10 taligidagi qolgan o‘rinlar ham erkaklarga nasib etdi.
“Microsoft” asoschisi Bill Geytsning boyligi $106 mlrd.ga, “Oracle” asoschisi Larri Ellisonning boyligi $101 mlrd.ga baholangan. Kuchli beshlikni Uorren Baffet $97 mlrd bilan yakunladi.
Shuningdek, kuchli 10 talikka “Google” asoschilari Larri Peyj va Sergey Brin, “Microsoft” sobiq bosh direktori Stiv Ballmer, biznesmen Maykl Blumberg va “Walmart” hammuassisi Jim Uolton kirdi.
| O‘rni | Eng boy 10 ta biznesmen | Kompaniyasi | Boyligi |
| 1 | Ilon Mask | “Tesla”, “SpaceX” | $251 mlrd |
| 2 | Jeff Bezos | “Amazon” | $151 mlrd |
| 3 | Bill Geyts | “Microsoft” | $106 mlrd |
| 4 | Larri Ellison | “Oracle” | $101 mlrd |
| 5 | Uorren Baffet | “Berkshire Hathaway” | $97 mlrd |
| 6 | Larri Peyj | “Google” | $93 mlrd |
| 7 | Sergey Brin | “Google” | $89 mlrd |
| 8 | Stiv Ballmer | “Microsoft” | $83 mlrd |
| 9 | Maykl Blumberg | “Bloomberg LP” | $76,8 mlrd |
| 10 | Jim Uolton | “Walmart” | $57,9 mlrd |
“Meta” (Facebook) kompaniyasi bosh direktori Mark Sukerberg $57,7 mlrd bilan 11-pog‘onani egalladi. Keyingi o‘rinlarda “Walmart” kompaniyasining yana bir vakilli Rob Uolton ($56,7 mlrd) bor.
“Koch Industries” xususiy kompaniyasi egasi Devid Koxning bevasi $56 mlrd bilan AQShning eng boy ayoli deb topildi.
Undan keyin ro‘yxatda “Walmart"ning yana bir aksiyadori Elis Uolton (55,7 milliard dollar) turibdi. 15-o‘rinni “Dell” kompaniyasi asoschisi Maykl Dell $50 mlrd boylik bilan egalladi.
“Nike” brendi rahbari Fil Nayt $41,5 mlrd, Jeff Bezosning sobiq xotini Makkenzi Skott $37,7 mlrd bilan mos ravishda keyingi o‘rinlarni egalladi.
“Mars” kompaniyasi asoschisi Forrest Marsning o‘gli Jon va qizi Jaklin Marslar $37 mlrd boylik bilan TOP-20 boylar ro‘yxatini yakunladi.
“Forbes USA” eng boy 20 amerikalikning umumiy boyligini $1,6 trln.ga baholadi. Bu o‘tgan yilga nisbatan $235 mlrd kam.
Umuman olganda, AQShdagi 400 ta eng badavlat tadbirkorning boyligi $500 mlrd.ga kamaydi.
