“Microsoft” kompaniyasi asoschisi Bill Geyts o‘z blogida yangi yil bayramida o‘qishni maslahat beradigan kitoblar ro‘yxatini e’lon qildi. Ro‘yxat nafaqat yangi kitoblarni, balki o‘tgan yillardagi bestsellerlarni ham o‘z ichiga oladi.
Geytsning ta’kidlashicha, u tanlangan kitoblar dunyo bo‘ylab 100 ta kichik bepul kutubxonaga (“100 Little Free Libraries”) qo‘shilgan. Ushbu notijorat tashkilot turli mamlakatlarda bepul kitoblar berilgan kichik qutilarga mezbonlik qiladi.
“G‘aroyib o‘lkada begona”, Robert Xaynlayn.
1960-yillarning ilmiy-fantastik klassikasi Geyts qalbida alohida o‘rin tutadi.
“O‘sha paytda men Pol Allen bilan uchrashdim va biz bir-birimizni ilmiy fantastika suhbati orqali bilib oldik. Men juda ko‘p o‘qiyman deb o‘ylardim, lekin Pol mendan o‘zib ketdi “, deb eslaydi tadbirkor. “Microsoft” asoschilaridan biri Pol Allen 2018-yilda vafot etdi.
Geyts “G‘aroyib o‘lkada begona"ni bolaligidagi eng sevimli ilmiy-fantastik kitob deb atagan. Bu Marsda o‘sgan odamning hikoyasi. Qahramon futuristik yerga boradi, u yerda din va urush haqidagi insoniy g‘oyalarni tushunish uchun kurashadi.
“Men sizni kelajakda nima bo‘lishi mumkinligi haqida o‘ylashga majbur qiladigan ilmiy fantastikani yaxshi ko‘raman”, deb yozgan Geyts.
Uning ta’kidlashicha, Xaynlaynning kitobida kelajakning ba’zi jihatlari, jumladan, hippi madaniyati va hatto suv to‘shaklari to‘g‘ri bashorat qilingan.
“Taslim bo‘lish”, Bono.
“Taslim bo‘lish” kitobi 2022-yil noyabr oyida chiqdi. Bu “U2” guruhi solisti Bononing (haqiqiy ismi Pol Devid Xyuson) avtobiografiyasi. Geyts uni o‘zi o‘qigan eng yaxshi rok yulduzi xotirasi deb atagan.
Geyts va Xyuson o‘n yildan ko‘proq vaqtdan beri do‘st bo‘lib, birgalikda global sog‘liqni saqlash va iqlim o‘zgarishi sohalarida xayriya ishlarida qatnashgan.
Tadbirkor uning sahna ortida “U2” qanday qilib eng ibratli qo‘shiqlarini yaratgani va Bono hamda uning guruhdoshlarini 40 yildan ortiq birga ushlab turgan narsaga yuqori baho beradi.
“Ular bir xil qadriyatlarga ega. To‘rttasi ham dunyodagi qashshoqlik va tengsizlikka qarshi kurashda ishtiyoqlidir, shuningdek, halol san’atkorlar bo‘lishga harakat qiladi”, — deb yozgan Geyts.
“Raqiblar jamoasi”, Doris Kerns Gudvin.
Geytsning tan olishicha, 2005-yilda nashr etilgan ushbu nobadiiy kitob uni hayratda qoldirgan.
“Raqiblar jamoasi” — AQShning 16-prezidenti Avraam Linkoln va uning idorasida ishlagan odamlarning tarjimai holi hisoblanadi. Ulardan ba’zilari ilgari 1860-yilgi saylovlarda Linkolnga qarshi chiqqan edi.
Kitob Linkolnning maslahatchilarni qarama-qarshi fikrlar bilan yarashtirish qobiliyatini ta’kidlaydi. Geytsga ko‘ra, bugungi kun rahbarlari Amerikaning sobiq prezidentidan ko‘plab g‘oyalarni olishlari mumkin.
“So‘nggi paytlarda men Gudvinning kitobi haqida o‘ylayapman, chunki u 2022-yilda juda dolzarb bo‘lib tuyuladi”, — deya qo‘shimcha qildi “Microsoft” asoschisi.
Noroziliklar, irq haqidagi qiyin savollar va davlatlar hamda mintaqalar o‘rtasidagi mafkuraviy bo‘linishlarga duch kelgan hozirgi davr va 1860-yillar o‘rtasida sezilarli o‘xshashliklar mavjud, deydi u.
“Mendeleyevning orzusi”, Pol Strathern.
Strathernning bu kitobi kimyo tarixiga, xususan, 1869-yilda kimyoviy elementlar davriy jadvalining birinchi versiyasini tuzgan rus kimyogari Dmitriy Mendeleevga bag‘ishlangan.
“Davriy jadval go‘zal san’at asari bo‘lishidan tashqari, menga bir kashfiyot qanday qilib son-sanoqsiz boshqalariga olib kelishi mumkinligini eslatadi”, deb yozadi u.
Koinotning barcha murakkabligi ushbu jadvaldagi xususiyatlardan kelib chiqadi. Biz atomlarni tushunganimiz sababli, chiplar, dasturiy ta’minot va sun’iy intellektni yaratishimiz mumkin. Bularning barchasi davriy jadvalga qaytadi.
“Tennis. Muvaffaqiyatli o‘yin psixologiyasi”, Timoti Galvey.
Galveyning kitobi nafaqat tennis mahoratini oshirishga qaratilgan. Bu yuqori samaradorlikning aqliy komponentiga qo‘llanma bo‘lishi mumkin.
Geyts kitobni birinchi marta 40 yil oldin o‘qigan va shundan beri uni vaqti-vaqti bilan qayta o‘qib chiqadi. Uning so‘zlariga ko‘ra, u kitobni do‘stlariga ham tavsiya qiladi, chunki undagi maslahatlar hayotning ko‘p sohalariga tegishli hisoblanadi.
Tennis murabbiyi Galveyning yozishicha, o‘yinchining ruhiy holati uning o‘yiniga atletik ko‘rsatkichlari kabi ta’sir qilishi mumkin.
Geytsning ta’kidlashicha, bu g‘oya unga karyerasida xatolar haqida o‘ylamasdan, konstruktiv tanqidga e’tibor berishga yordam bergan.
“Ko‘pchiligimizga o‘zimizni tanqid qilish oson, bu esa samaradorlikni yanada pasaytiradi. Xatolar ustida o‘ylamasdan, ulardan saboq olishimiz kerak”, deb yozgan Geyts.
Avvalroq “Tenge Bank” vakili Ulug‘bek Tavakkalov 8 ta kitob, “OSON” to‘lov tizimi asoschisi va rahbari Farhod Mahmudov esa 6 ta kitob tavsiya qilgandi.
