2022-yilda xorijdan O‘zbekistonga amalga oshirilgan pul o‘tkazmalari hajmi $17 mlrd.ni tashkil etgan. Bu haqda Markaziy bank raisi Mamarizo Nurmuratov ma’lum qildi, xabar beradi “Spot” muxbiri.
2021-yilda xalqaro pul oʻtkazmalari orqali mamlakatga $8,1 mlrd miqdorida valyuta mablagʻlari kelib tushgandi.
O‘tgan yilda mamlakatga amalga oshirilgan o‘tkazmalarning 85%i ya’ni $14,5 mlrdi Rossiya hissasiga to‘g‘ri keladi. Natijada bu ko‘rsatkich 2021-yilga nisbatan 2,6 baravar oshgan.
Shuningdek, O‘zbekistondan boshqa mamlakatlarga amalga oshirilgan pul o‘tkazmalari hajmi $2,1 mlrd.ni tashkil etib, 2021-yilga nisbatan 29%ga o‘sgan.
O‘zbekistonliklar asosan Turkiya, Xitoy, AQSh hamda Hindiston kabi mamlakatlarga pul o‘tkazmalarini amalga oshirgan. Regulyator raisining qayd etishicha, bu mamalakatlar qatorida deyarli o‘zgarish yo‘q.
2022-yilning birinchi choragida O‘zbekistonga $1,47 mlrd.lik pul o‘tkazmalari amalga oshirilgandi. To‘qqiz oyda esa mamlakatga amalga oshirilgan pul o‘tkazmalari hajmi qariyb $13 mlrd.ga yetdi.
Avvalroq, O‘zbekiston Qozog‘istondan yuborilgan pul o‘tkazmalari hajmi bo‘yicha yetakchilik qilishi xabar berilgandi.
O‘tgan yilning yanvaridan noyabrigacha bo‘lgan davrda Qozog‘istondan 962,7 mlrd tenge ($2,07 mlrd) jo‘natilgan va bu ko‘rsatkich 2021-yilga nisbatan 4,5%ga ko‘pdir.
