“Spot” xodimlari uchun eng qulay sharoitlarni yaratib beradigan turli kompaniyalarning ish joylari haqida turkum materiallarni berishni boshladi. Biz nega menejment bunga sarmoya kiritayotgani, xodimlar uchun qanday afzalliklar borligi va korporativ madaniyatni kuchaytirish nega zarurligini o‘rganamiz.
Kompaniya bozorda 11 yildan ortiq vaqtdan beri ishlaydi, uning ilovasidan 9 mlnga yaqin kishi foydalanadi. Hammasi bo‘lib, “CLICK” 350 dan ortiq xodimni ish bilan ta’minlamoqda, ularning 80%i ofisdan turib ishlaydi.
Kompaniya bosh direktori Ulug‘bek Rustamov “Spot"ga ish joyini yaratish uchun qancha mablag‘ sarflangani, ular nima uchun erkin ish jadvalini joriy qilgani va bu xodimlarning mehnat unumdorligiga qanday ta’sir qilgani, xodimlar uchun sharoitlarni qanday yaxshilashni rejalashtirayotgani haqida gapirib berdi.
Ofis qanday tuzilgan?
“CLICK” ofisi Oasis biznes markazida joylashgan. Keng, ixcham va qulay — kompaniya ofisiga kirganingizda shunday xulosa paydo bo‘ladi. Ko‘plab yashil o‘simliklar (hatto daraxt ham bor), tabiiy va sun’iy yoritish tizimi, abstrakt kartinalar va ilhomlantiruvchi graffiti.
Ofisni (800 kv.m.) tashkillashtirish uchun 2,5 mlrd so‘m sarmoya kiritilgan. Pandemiyadan keyin qo‘shimcha joy olishga majbur bo‘lingan. Hozirda ish joylari 1,5 ming kv.m.ni egallaydi.
“Ofis pandemiya davrida jihozlana boshladi. Men karantindan keyin xodimlarning ofisga qaytishni xohlashlarini kutmagan, ularning yarmi uydan ishlashni davom ettiradi deb o‘ylagandim. Hozir xodimlarning 80%dan ortig‘i ofisda ishlaydi. Garchi biz buni talab qilmasak ham. Shuning uchun biz hammani joylashtirish uchun qo‘shimcha 500 kv.m olishimiz kerak edi. Hozir biz biznes markazi o‘rta blokining to‘rt qavatini egallab turibmiz”, — dedi Ulug‘bek Rustamov.
Demak, kompaniyadagi asosiy afzallik — bu ish jadvalining yo‘qligi. Har kim o‘zi uchun qulay vaqtda ishlaydi.
Bu yerda, “Amazon” yoki “Google” kabi yirik IT-kompaniyalarida bo‘lgani kabi, doimiy ish joylari yo‘q, shuning uchun siz stolda, yumshoq “bin-bag” yoki stulda o‘tirib, diqqatni jamlashingiz kerak bo‘lganda esa kichik kabinada ishlashingiz mumkin. Shuningdek, tog‘larga qaragan balkonda yoki o‘zingizni o‘rmonda his qiladigan alohida tinch hududda ishlash imkoniyati mavjud.
Navbatdagi farqli jihati shundaki, xodimlar hech qayerda tushlik qilishlari shart emas. Har bir qavatda kafe mavjud, u yerda siz ovqatga buyurtma berishingiz yoki o‘zingiz bilan olib kelgan ovqatni isitishingiz mumkin. Choy va qahva bepul taqdim etiladi.
Qizlar uchun alohida xona jihozlangan — makeup room. Bu qulay, chunki klassik ofislarda qizlar ishdan keyin tadbirga borishlari kerak bo‘lsa, ular kiyinish va o‘zini tartibga keltirish uchun qo‘shimcha vaqt sarflashadi. “CLICK” ofis xodimlari tayyorlanish uchun uyga borishlari shart emas, bu xonada siz uchun zarur bo‘lgan hamma narsani qilish mumkin.
Xodimlar, shuningdek, mos ravishda sport zaliga va dush xonalariga bepul kirishlari mumkin. Ko‘pchilik ish kuni boshlanishidan oldin ishlashga vaqt topish uchun erta (soat 7−8 da) kelishadi. Ba’zilar ishdan keyin mashq qilishni afzal ko‘rishadi.
“Biz dasturchilarning asosan bir joyda o‘tirib qolgan tarzda ishlashini tushunamiz. Ularning jismoniy faolligi yetarli emas, shuning uchun ularning sog‘lig‘i yomonlashadi. Shu bois, xodimlar yo‘l va sport zali uchun vaqt va pulni behuda sarflamasliklarini o‘ylab shu yerning o‘zida sport zali ochdik”, — dedi kompaniya rahbari.
Buning ustiga, xodimlar PlayStation o‘ynash imkoniyatiga ega.
“Hozir biz kichik Spa-salon yaratish jarayonidamiz, u yerda massaj qabul qilish, psixologga murojaat qilish, manikyur va pedikyur qilish mumkin. Afsuski, bizga bu yerda basseyn tashkil qilishga ruxsat berilmadi. Lekin menimcha, keyingi ofisimiz albatta basseynga ega bo‘ladi. Musiqa xonasi tashkil qilish ham rejalashtirilgan, chunki musiqa ilhomlantiradi, o‘zgacha kayfiyat yaratadi”, — dedi Rustamov.
Xohishga qarab, ofisda hatto biroz uxlab olish ham mumkin. Buning uchun divanli alohida xona mavjud.
“Ofisdagi muhit kovorkingni eslatadi, bu yerda hamma teng, umumiy joylar ko‘p. Bu ko‘p muammolarni ancha tezroq hal qilishga yordam beradi, chunki hamma ochiq, uchrashuv tayinlash yoki kimdir bo‘sh bo‘lguncha kutishning hojati yo‘q. Bu tezkor qaror qabul qilishga yordam beradi”, — dedi “CLICK” bosh direktori.
Nima uchun qulayliklarga investitsiya qilish kerak
Inson ko‘p vaqtini ish joyida o‘tkazadi, shuning uchun kompaniya uchun ofisda qulay sharoitlar yaratish muhimdir. Bundan tashqari, “CLICK"da atrofdagi muhit muhim bo‘lgan ko‘plab ijodkor odamlar ishlaydi.
“Bundan tashqari, ofis nafaqat ishlash uchun qulay joy, balki HR brend hamdir. Odamlar ishga joylashish uchun kelganlarida bu qulayliklarning barchasini ko‘rishadi. Ko‘pincha, dasturchilar uchun ish sharoitlari ma’lum darajadagi maoshdan ham muhimroq bo‘lishi mumkin. Biz mahalliy „Google“ bo‘lmoqchimiz”, — dedi kompaniya rahbari.
Kompaniya 2021-yil mart oyida yangi ofisiga ko‘chib o‘tdi.
“Bu harakat xodimlarning mehnat unumdorligiga ta’sir qilganini aniq ayta olmayman, chunki ayni paytda ko‘plab jarayonlar avtomatlashtirilgan edi. Tabiiyki, faqat boshqa ofisga ko‘chib o‘tishning o‘zigina xodimlarning samaradorligini keskin oshira olmaydi. Ammo pandemiya ro‘y berib, erkin jadval joriy etilgandan so‘ng samaradorlik 40%ga oshdi”, — dedi Ulug‘bek Rustamov.
Kompaniyada bu shunday izohlanadi: odamlar shartli ravishda, 9 dan 18 gacha ishlaganda, ularda sifatli ish qilish maqsadi qolmaydi. Ular shunchaki qandaydir tarzda ishga borishni xohlashadi, 11 da ular tushlik uchun qayerga borishni o‘ylashni boshlaydilar, keyin hamma bunga tayyorlanadi, 14 da qaytib kelishadi. Va 16 da ular allaqachon ish kunining oxiri yaqinlashmoqda deb o‘ylashadi va soat 18 ga kelib bosh ishlamay qoladi.
Ulug‘bek Rustamovning qayd etishicha, bu cheklovlar olib tashlanganida, ular ham xodimlarning ongidan olib tashlandi.
Korporativ madaniyat
Kompaniyada ta’kidlanishicha, ularda iyerarxik noto‘g‘ri qarashlar yo‘q. Korporativ madaniyat erkinlikda namoyon bo‘ladi.
“Biz “CLICK"ni oilaga aylantirishga harakat qilyapmiz. Biz odamlar o‘zlarini oila a’zolari kabi his qilishlarini xohlaymiz. Bu yerda kimdir boshliq, kimdir oddiy xodim ekanligini ko‘rmaysiz, chunki hamma o‘zini teng tutadi”, — deb hisoblaydi Ulug‘bek Rustamov.
Yiliga bir necha marta kompaniya keng ko‘lamli tadbirlarni (Oila kuni, Click Day va boshqalar) o‘tkazadi. Vaqti-vaqti bilan xodimlar yig‘ilib, dam olish kunlarini karaoke, bouling, tog‘lar va hokazolarda o‘tkazishadi.
Xodimlarda belgilangan ish jadvali yo‘q. Umuman olganda, kompaniya “jadval” so‘zini ishlatmaydi. Ishchilarning ofisga chiqishini hech kim nazorat qilmaydi. Shuningdek, ofisga tashrif buyurishni hisobga olish tizimi mavjud emas. Barcha xodimlar ma’lum bir sanaga qadar bajarilishi kerak bo‘lgan vazifalarni olishadi.
Kompaniya rahbariyati bu shaxs topshiriqlarni qayerda va qanday bajarishi bilan qiziqmaydi: ofisda, uyda, boshqa davlatdagi ta’tildan va hokazo… Asosiysi, xodim topshiriqni belgilangan muddatdan oldin bajarishi hisoblanadi.
Ofis 24/7, hatto dam olish kunlari ham ishlaydi. Shuning uchun, agar kimdir kunning birinchi yarmida shaxsiy yoki oilaviy biznes bilan shug‘ullanishi kerak bo‘lsa, u kechki ovqatga kelishi va kechgacha / tungacha ishlashi mumkin.
Rivojlanishni qo‘llab-quvvatlash va qo‘shimcha yordam
Kompaniyada yoshi kattaroq xodimlar yoshlarga ish o‘rgatishi odatiy hol hisoblanadi. Shunday qilib, jamoaning o‘sishi rag‘batlantiriladi. Bundan tashqari, xodimlarning malakasini oshirish bo‘yicha uchinchi tomon — o‘quv markazlari bilan hamkorlikda ish olib borilmoqda.
Bunday dasturlar doirasida xodimlar, jumladan, eng yaxshi xorijiy ta’lim muassasalarida onlayn tarzda o‘qish imkoniyatiga ega. Kompaniya muntazam ravishda turli sohalarda xalqaro murabbiylarni taklif etadi.
Kompaniya, shuningdek, xodimlarga, masalan, kvartira yoki mashina sotib olish uchun kredit dasturiga ham ega.
Pandemiya paytida xodimlar uylarini tark etmasliklari uchun oziq-ovqat yuborildi, ularning MSKT (Ko‘p qismli kompyuter tomografiyasi) dan o‘tishi, PZR testlari topshirishi va davolanishi uchun pul to‘landi.
“Bizning asosiy resursimiz odamlardir. Ularsiz, bugungi kunda hammaga ma’lum bo‘lgan „Click“ shakllanishining iloji yo‘q edi. Ish joyida ijobiy va konstruktiv muhitni saqlash ustuvor vazifa va kompaniyaning muvaffaqiyatli faoliyat yuritishining kafolatidir”, — deya xulosa qildi Ulug‘bek Rustamov.
