Tashqi mehnat migratsiyasi agentligi hamda Germaniyaning “ConsultingUz” tashkiloti orqali “EUROPA-PARK GmbH” kompaniyasida mehmonxona, restoran, oshxona sohalarida ishlash istagida bo‘lgan fuqarolar ishga taklif etiladi.
Nomzodlar nemis tilini kamida B1 darajada bilishi (sertifikat talab qilinmaydi), 18−40 yosh oralig‘ida va sudlanmagan hamda jismonan sog‘lom bo‘lishi kerak.
Talabgorlar uchun sinov muddati 6 oyni tashkil qiladi.
Nomzodlar quyidagi sohalardan birida diplom ega bo‘lishi kerak:
- turizm menejmenti;
- mehmonxona ishi;
- oziq-ovqat texnologiyalari;
- xalqaro turizm;
- menejment;
- germanistika;
- lingvistika;
- iqtisodchi;
- biznesni boshqarish
- ingliz tili;
- nemis tili;
- fransuz tili.
Oylik 2200 yevro (brutto)dan boshlab va mehnat sharoitlari nemislar bilan bir xil (oylik, sug‘urta, taʼtil);
Nomzodlar O‘zbekistondan Germaniyaga bir tomonlama aviachipta va aeroportdan ish joyigacha transfer hamda arzonlashtirilgan turar-joy bilan taʼminlanadi.
Ro‘yxatdan o‘tish uchun zarur hujjatlar:
- tarjimai hol (nemis yoki ingliz tilida);
- yuqoridagi sohalardan birini bitirganlik haqida diplom (4-bosqich talabasi diplomni olgandan so‘ng ham jo‘natishi mumkin);
- shaxsni tasdiqlovchi hujjat (pdf shaklda).
Nomzodlar hujjatlarni havola orqali yuborishi mumkin.
Muhim: Nemis tilini bilmaydiganlar Namangan, Farg‘ona, Buxoro va Navoiy shaharlarida tashkil qilingan nemis tili o‘qitish markazlarida B1 daraja olishlariga ko‘maklashiladi.
Qo‘shimcha maʼlumot uchun telefon raqamlari: +998712023355, (1282 qisqa raqami).
Avvalroq “Spot” Germaniyaning “Duvenbeck Kraftverkehr” tashkiloti o‘zbekistonliklarni yuk mashinasi haydovchisi sifatida ishga taklif qilayotgani haqida yozgandi.
