Joriy yilning fevral holatiga oylik inflyatsiya 0,5%ni tashkil etib, yillik ko‘rsatkich esa 12,2%ga yetdi. Bu haqda Statistika agentligi xabar berdi.
Oziq-ovqat mahsulotlari narxi o‘tgan oyga nisbatan 0,3%ga, dekabr bilan solishtirganda 0,75%ga o‘sgan.
Qayd etilishicha, un (-1,6%), kungaboqar yog‘i (-1,3%), tuxum (-1,3%), mol go‘shti (-1,2%), qo‘y go‘shti (-0,7%) narxlari arzonlashgan.
Narxlar oshishi piyoz (+9,0%), guruch (+4,0%), kartoshka (+2,4%) narxlarida kuzatilgan.
Statistika agentligi ma’lumotlariga ko‘ra, ijara narxlarida o‘zgarish bo‘lmagan.
2022-yilda O‘zbekistonda inflyatsiya darajasi 12,3%ni tashkil etdi. Bu haqda Davlat statistika qo‘mitasining matbuot xizmati xabar berdi.
Xususan, iste’mol narxlari indeksi Markaziy bank tomonidan prognoz qilingan 12−12,5%ga mos keladi.
Bunga mavjud inflyatsion jarayonlar, pul-kredit sharoitlari, import inflyatsiyasi ta’sirining saqlanib qolishi va yuqori noaniqliklar sharoiti ta’sir qilishi ta’kidlangandi.
O‘tgan yilning dekabr oyida iste’mol sektoridagi tovarlar va xizmatlar o‘rtacha 1,2%ga oshdi. Bu ko‘rsatkich 2021-yilning dekabr oyida ham mos raqamlarni qayd etgandi. Taqqoslash uchun, 2020-yilning dekabr oyida bu ko‘rsatkich 1,5%ni, 2019-yil dekabrida 1,6%ni tashkil qilgan.
O‘tgan yilning dekabr oyida narxlar va tariflar o‘sishida yetakchi o‘rinlarni oziq-ovqat mahsulotlari egalladi hamda ularning narxlari o‘rtacha 1,7%ga oshdi.
Shuningdek, nooziq-ovqat tovarlari narxlari 0,8%ga va aholiga pullik xizmatlar ko‘rsatish 1,1%ga oshgan.
Yil boshida iste’mol sektoridagi tovarlar va xizmatlar ko‘rsatkichi o‘rtacha 0,9%ga qimmatlashgandi. Noyabr oyiga kelib esa ko‘rsatkich 1,3%ni tashkil etdi.
Bundan tashqari, 2022-yil boshida yillik o‘sishda iste’mol narxlari indeksi darajasi 9,8%ga yetgandi. Regulyator 2023-yil uchun bazaviy ssenariy doirasida 8,5−9,5%gacha pasayishni prognoz qildi.
