Prezident tomonidan “Davlat mulkini boshqarish to‘g‘risida"gi qonun imzolandi.
Unga ko‘ra, mazkur hujjat davlat mulkini boshqarish sohasidagi munosabatlarni tartibga soladi.
Davlat mulkiga bo‘lgan mulk huquqi fuqarolik qonunchiligida nazarda tutilgan asoslar hamda quyidagilarga asosan yuzaga keladi:
- shartnomalar va boshqa bitimlar tuzilganda;
- mol-mulkni yoki mol-mulkdan foydalanish huquqini, soliqlar va yig‘imlar bo‘yicha qarzdorlikni, davlat ulushi bo‘yicha hisoblangan dividendlarni xo‘jalik jamiyatining ustav fondiga (ustav kapitaliga) kiritish yo‘li bilan ulushni olishda;
- sud qarorlari asosida.
Shuningdek, mazkur qonun bilan ayrim davlat mulklari xususiylashtirilmasligi keltirilgan. Xususan:
- O‘zbekiston hududi doirasidagi yer, yer osti boyliklari, suv omborlari, havo bo‘shlig‘i, o‘simlik va hayvonot dunyosi;
- moddiy madaniy meros obyektlari, arxiv hujjatlari, davlat muzeylari va muhofaza etiladigan tabiiy hududlar, shu jumladan xiyobonlar va botanika bog‘lari.
Davlat mulkini quyidagilar tomonidan boshqariladi:
- Vazirlar Mahkamasi;
- Agentlik;
- maxsus vakolatli davlat organlari;
- davlat muassasalari va davlat organlari;
- mahalliy davlat hokimiyati organlari.
Davlat aktivlarini boshqarish agentligi davlat mulkini boshqarish sohasidagi vakolatli davlat organi hisoblanadi.
Bundan tashqari, davlat mulki reyestrini yuritish Vazirlar Mahkamasi belgilagan tartibda va shaklda Agentlik tomonidan amalga oshiriladi.
Agentlik har yili 1-avgustgacha davlat ishtirokidagi korxonalarning o‘tgan moliya yilidagi faoliyati samaradorligi to‘g‘risidagi yig‘ma hisobotni o‘z rasmiy veb-saytida e’lon qiladi.
Qonun rasmiy e’lon qilingan kundan e’tiboran kuchga kiradi.
Avvalroq, 2023-yilga mo‘ljallangan davlat dasturi bo‘yicha prezident farmoni qabul qilingandi.
