Markaziy bank to‘lov tizimlarini o‘rganish natijalariga ko‘ra, 1-yanvar holatiga, O‘zbekistonda masofaviy bank xizmatlaridan 30 mln foydalanuvchi foydalanadi.
Ularning 1,2 mlni tadbirkorlik subyektlari bo‘lib, ya’ni yil boshida jami 28,8 mln jismoniy shaxs bank hisobvaraqlari va bank kartalarini onlayn boshqarish bo‘yicha yechimlardan foydalangan.
Masofaviy onlayn-tranzaksiyalar hajmi rekord darajadagi 145,8 trln so‘mga yetdi.
Bunga banklarning mobil ilovalarida jismoniy shaxslar uchun asosiy bank xizmatlaridan foydalanish imkoniyatining mavjudligi yordam berdi.
Bundan tashqari, O‘zbekiston fuqarolarining to‘lov xizmatlaridagi faolligi oshdi. O‘tgan yili ular orqali o‘tkazilgan pul mablag‘lari hajmi 2021-yilga nisbatan ikki baravar ko‘payib, 116 trln so‘mni tashkil etdi.
Markaziy bank kontaktsiz to‘lovlardan foydalanish kengayganini qayd etadi. Keyingi yillarda ularni qabul qilish uchun shart-sharoit yaratish, birinchi navbatda, savdo va xizmat ko‘rsatish sohasida amalga oshirilayotgan ishlar o‘z samarasini bermoqda.
2022-yilda QR-kodlar orqali to‘lovlar hajmi 191,6 mlrd so‘mni tashkil etdi. Bu o‘tgan yilga nisbatan 12,8 barobar ko‘pdir.
QR Online tizimidagi tranzaksiyalar soni 4 baravardan ortiq o‘sdi va 63 287 tani tashkil etdi.Shu bilan birga, to‘lov QR kodlari soni atigi 8 mingtaga oshdi.
Smartfonlarning NFC-qurilmalari orqali to‘lovlar infratuzilmasini rivojlantirish ham davom etmoqda. Hozirda “Tap-to-phone” tizimidan 2300 dan ortiq korxona foydalanmoqda va xizmat 21 bankning mobil ilovalariga integratsiya qilingan.
O‘tgan yil davomida NFC tranzaksiyalari hajmi 2,1 barobar oshib, 25,5 trln so‘mga yetdi.
Avvalroq “Spot” HUMO va UZCARD’ni to‘liq integratsiyalash rejalari va to‘lovlar sohasidagi boshqa yangiliklar haqida yozgandi.
