Germaniyada ishlash istagidagi o‘zbekistonliklardan mehmonxona va restoran sohasi bo‘yicha ausbildung (o‘qish va ishlash) dasturiga arizalar qabul qilinmoqda.

Bu haqda Tashqi mehnat migratsiyasi agentligi matbuot xizmati xabar berdi.

Ish vaqti haftasiga 40 soatni tashkil etadi. Unda quyidagi yo‘nalishlar mavjud:

  • mehmonxona xodimi (davomiyligi 3 yil);
  • gastronomiya bo‘yicha mutaxassis (davomiyligi 2 yil);
  • oshpaz va oshpaz yordamchisi (davomiyligi 3 yil);
  • restoranlar va tadbirlarni o‘tkazish bo‘yicha mutaxassis (davomiyligi 3 yil);
  • restoran xizmatchisi (davomiyligi 3 yil).

Qabul qilinganlar uchun oylik stipendiya 850 yevrodan boshlanadi. Shuningdek, Germaniyada transfer xarajatlarini qoplashga va arzonlashtirilgan yashash joyi topishga yordam beriladi.

Nomzodlar nemis tili bo‘yicha Gyote, ECL yoki TELCdan olingan B1 sertifikatiga, o‘rta maxsus ta’lim shahodatnomasiga ega bo‘lishi kerak.

"Spot.uz"da reklama

Shuningdek, ishtirokchilar 18−30 yosh oralig‘ida, sog‘lom hamda sudlanmagan bo‘lishi zarur.

Loyiha haqida batafsil bu yerda.

Bundan tashqari, “Ferienjob” (“Work and travel”) loyihasi orqali yuqoridagi sohalar bo‘yicha mavsumiy (90 kungacha) ishlarga talabalardan ham arizalar qabul qilinmoqda.

Loyiha doirasida 2076 yevro (2076 Brutto, 1479 yevro netto) oylik maosh beriladi hamda Germaniyada transfer xarajatlarini qoplashga va arzonlashtirilgan yashash joy topishga yordam beriladi.

“Ferienjob” loyihasiga hujjat topshirmoqchi bo‘layotgan nomzodlar uchun talablar:

  • oliygoh talabasi bo‘lish;
  • haftasiga 40 soatlik ish (kunlik 8 soat);
  • 18−30 yosh;
  • nemis tili bo‘yicha Gyote, ECL yoki TELCdan olingan A2 sertifikati (qo‘shimcha til bilish ustunlik beradi);
  • mehmonxona va gastronomiya sohalari bo‘yicha malakaga ega bo‘lish;
  • jamoada ishlash va kirishuvchanlik;
  • sog‘lom va sudlanmaganlik.

Nomzodlar quyidagi hujjatlarni yuklagan holda ro‘yxatdan o‘tishi mumkin:

  • xorijga chiqish pasporti (pdf shaklda);
  • nemis tilini bilish haqidagi sertifikat (Gyote, ECL yoki TELCdan pdf shaklda);
  • nemis tilidagi tarjimai hol (Lebenslauf, pdf shaklda);
  • nemis tilidagi motivatsiya xati (Motivationsschreiben, pdf shaklda).

Loyiha haqida batafsil ma’lumotni bu yerdan olish mumkin.

Har ikkita loyiha uchun ro‘yxatdan o‘tish manzili:

Avvalroq Germaniyada avtomobil mexatronikasi (texnik) sohasida ishlash istagidagi o‘zbekistonliklar ausbildungga taklif etilayotgani haqida xabar berilgandi.