Iyul oyida iste’mol narxlari indeksi 0,16% ga kamaydi. Mavsumiy deflyatsiya ikkinchi oydirki davom etmoqda, deya xabar beradi Statistika agentligi.
Yil boshidan buyon inflyatsiya iyun oyiga nisbatan biroz pasayib, 3,3%ni tashkil etdi. Bu so‘nggi besh yildagi eng past ko‘rsatkichdir. O‘rtacha oylik narxlar esa 0,5%ga oshgan.
Bundan tashqari, yillik inflyatsiya 8,9%ga tushdi. Natijada, so‘nggi yillarda birinchi marotaba narxlarning o‘sish sur’ati 9%dan pasaydi.
Oziq-ovqat mahsulotlari an’anaviy ravishda arzonlashda davom etdi va oyiga 1%ga tushdi. Yil boshidan (2,7%) va o‘n ikki oy davomida (10%) narxlarning o‘sishi so‘nggi yillarda minimal darajaga etdi.
Bundan tashqari, oziq-ovqat mahsulotlaridan mavsumiy sabablarga ko‘ra narxlarning eng kuchli pasayishi sabzavotlarda kuzatilgan — oyiga 7,4%.
Xususan, yil boshida pomidor narxlarining sakrashidan keyin, deyarli uchdan biriga arzonlashdi, ammo o‘tgan iyul oyiga qaraganda hali ham 61% qimmatroq.
Piyoz hozir bir oy oldingiga qaraganda 20% arzonga tushdi va bir yil ichida chorak baravar arzonlashdi. Kartoshka narxi 14,5%ga, baqlajon 37,6%ga arzonlashdi.
Shu bilan birga, bodring narxi 8,1%ga, sabzi deyarli 6%ga qimmatlashgan.
Yog‘-moy mahsulotlari va shirinliklar 1,5%ga, sut mahsulotlari va tuxumlar 1%ga arzonlashdi. Shu bilan birga, baliq (0,2%), go‘sht mahsulotlari (0,4%) hamda guruch (1,7%) biroz oshdi.
Iyul oyida ishlab chiqarilgan mahsulotlar 0,3%ga qimmatlashdi, narxlar esa yil davomida atigi 7,3%ga oshdi. Kiyim va poyafzal narxlarining o‘sishi 0,1% gacha sekinlashdi, o‘tgan iyul oyiga nisbatan mos ravishda 6,7% va 6%ni tashkil etdi. Mebel uchun oylik o‘sish 0,3%, yillik o‘sish esa 6,6%ni tashkil etdi.
Maishiy texnika narxining oshishi biroz tezlashdi — oyiga 0,6%ga va yiliga 7,6%ga. O‘tgan oy davomida elektronika narxlari nisbatan barqaror bo‘lib, o‘tgan iyul oyidan beri 2,5%ga o‘sdi.
Dori-darmonlar esa 0,2%ga qimmatlashdi, yillik o‘sish esa taxminan 16%ni tashkil etmoqda.
Bir oy ichida benzin 2%ga qimmatlagan. Biroq, propan narxi atigi 0,8%ga oshdi, metan narxi esa deyarli o‘zgarmadi.
Xizmat ko‘rsatish sohasida narxlar o‘tgan oyda eng ko‘p o‘sishni qayd etdi — 0,5%. O‘tgan iyul oyiga nisbatan o‘sish so‘nggi uch yildagi eng yuqori ko‘rsatkich (8,2%) bo‘ldi.
Shu bilan birga, umumiy ovqatlanish atigi 0,6%ga (yiliga 26,4%), mehmonxona xizmatlari 0,3%ga (21,3%) qimmatlashdi.
Transport xizmatlari narxi sezilarli darajada o‘rtacha 1%ga oshgan. Ijara narxlari 0,3%ga oshdi.
Avvalroq aholi va tadbirkorlarning inflyatsion kutilmalari pasayayotgani haqida xabar berilgandi.
Aholining narxlar o‘sishi bo‘yicha kutilmalari 13,3%ni, tadbirkorlarniki esa 13,3%ni tashkil etdi.
