“Apple” ijtimoiy tarmoqlarda mijozlarni qo‘llab-quvvatlash bo‘yicha maslahatchi lavozimini bekor qilishni rejalashtirmoqda, deb yozadi “Macrumors” vaziyatdan xabardor bir necha kishilarga tayanib.
Qayd etilishicha, bu mutaxassislar “X” (sobiq Twitter) va “YouTube"dagi so‘rovlarga javob berishadi.
1-oktabrdan boshlab foydalanuvchilar “X"dagi “Apple” texnik qo‘llab-quvvatlash xizmatining rasmiy akkauntiga shaxsiy xabarlar orqali yordam ololmaydilar.
Xodimning javobi o‘rniga ular bilan bog‘lanish mumkin bo‘lgan kompaniya kontaktlari ko‘rsatilgan avtomatik bildirishnoma olinadi, dedi nashr suhbatdoshlaridan biri.
“Apple” shuningdek, “YouTube” videolari ostidagi izohlarga javob berishni to‘xtatadi va “Apple Support Community” forumidagi muhokamalarda yordam bergan jamiyat mutaxassisining pullik lavozimini tugatadi. Kompaniya 2023-yilning qolgan oylarida o‘zgarishlar kiritishni rejalashtirmoqda.
Ushbu lavozimlarni egallagan xodimlarga kompaniyaning call-markazlariga ishga borish taklif etiladi.
Ulardan ba’zilari mijozlar bilan yozma ravishda muloqot qilishni xohlashlarini aytishdi, biroq “Apple” ularga telefon liniyasida ishlash uchun sog‘lom bo‘lmagan taqdirdagina chatlarga o‘tishga ruxsat berdi.
Taklifga rozi bo‘lganlar 2023-yilning noyabrigacha o‘qitilib, call-markazlarga joylashtiriladi.
O‘zgarishlarga rozi bo‘lmagan xodimlardan yangi ish o‘rinlari topish so‘ralgan. Macrumorsga ko‘ra, biz “yuzlab” ishchilar haqida gapiramiz. Ularning soni 150 dan ortiq, deb yozadi “The Verge” nashri.
“The Verge” nashrining yozishicha, kompaniya shu tarzda xarajatlarni kamaytirishga harakat qilmoqda. Masalan, “X” API bilan ishlash narxlarini oshirganligi fonida.
Nashr, shuningdek, ijtimoiy tarmoqlar mijozlarga texnik yordam ko‘rsatishning eng samarali usuli bo‘lmagan bo‘lishi mumkinligini ta’kidlaydi.
Avvalroq “Spot” “Apple"ning yillik taqdimoti tahminiy sanasi ma’lum qilingani haqida yozgandi.
12-sentabr kuni Apple iPhone 15, 15 Plus, 15 Pro va 15 Pro Max kabi to‘rtta smartfon, shuningdek Watch Series 9 va yangi Watch Ultra’ni taqdim etishi kutilmoqda.
