O‘zbekistonda relokantlarning chiqib ketishi IT-xizmatlarini eksport qilish bo‘yicha maqsadlarga erishishga ta’sir qilmaydi. Bu haqda Raqamli texnologiyalar vaziri o‘rinbosari Rustam Karimjonov matbuot anjumanida ta’kidladi, deya xabar beradi “Spot” muxbiri.
“IT Park"ning ta’limni rivojlantirish bo‘yicha direktor o‘rinbosari Mahliyo Muqsinova o‘tgan yili relokantlar oqimi bo‘lganini, bu mahalliy bozorga ijobiy ta’sir ko‘rsatganini ta’kidladi.
Xususan, chet elliklarning tashrifi mahalliy mutaxassislar bilan tajriba almashishga xizmat qildi. Biroq, u relokantlarning mahalliy IT-bozorining rivojlanishiga bevosita ta’sirini ko‘rmadi.
“Menimcha, hech qanday to‘g‘ridan-to‘g‘ri ta’siri bo‘lmagan, chunki bu tabiiy jarayon. Relokantlar kelganda, nimadir tezroq amalga oshdi, chunki biz bilim almashdik, ammo yangi narsalarni joriy qilish, bu bilimlarni amalga oshirish uchun vaqt kerak”, — dedi Muqsinova.
Rustam Karimjonov, o‘z navbatida, ko‘chib o‘tayotganlar oqimiga qaramay, IT-xizmatlari eksportini oshirish bo‘yicha belgilangan maqsadlarga erishilishini ta’kidladi.
“Bu yerga kelib-ketayotgan relokantlar soni qancha bo‘lishidan qat’i nazar, belgilangan rejalar amalga oshiriladi, chunki asosiy eksport — 90%dan ortig‘i mahalliy mutaxassislar tomonidan amalga oshiriladi. Shu bois, relokantlar va umuman mutaxassislarning ko‘chishi hamda oqimi oldimizda turgan umumiy eksport maqsadlariga katta ta’sir ko‘rsatmaydi”, — dedi vazir o‘rinbosari.
Uning so‘zlariga ko‘ra, O‘zbekistonda IT-eksportini oshirishga qaratilgan ko‘plab turli dasturlar mavjud.
2030-yilga borib IT-xizmatlari eksportini $5 mlrdgacha oshirish rejalashtirilgan, ularning yarmidan ko‘pi AQSh bozoriga to‘g‘ri keladi.
Avvalroq Sirdaryo viloyati filialida masofaviy xizmatlar eksporti BPO logistika markazi ochilgani haqida xabar berilgandi.
