Avvalroq energetika sohasini isloh qilishning navbatdagi bosqichini amalga oshirishga qaratilgan prezident farmoni qabul qilingandi.
Hujjat bilan, davlat rahbari hukumat huzuridagi Energetika bozorini rivojlantirish va tartibga solish agentligini tashkil etish bo‘yicha topshiriq berdi. Bunda, 1-yanvarga qadar uning faoliyati to‘g‘risidagi nizomni tayyorlash rejalashtirilgan.
Agentlik raqobatbardosh elektr energiyasining ulgurji va chakana bozorlarini yaratishni ta’minlashi shart. Uning vazifalariga ushbu bozorlarda ishtirokchilarni litsenziyalash, litsenziya shartlariga rioya etilishini nazorat qilish, sohada tenglik va shaffoflikni ta’minlash kiradi.
2026-yildan agentlik tomonidan elektr energiyasini uzatish va taqsimlash tariflari hamda to‘lovlari miqdorlari tasdiqlanadi.
Yangi tuzilma elektr energiyasi ishlab chiqarishni ko‘paytirish va infratuzilmani yaratish sohasida uzoq muddatli siyosatni shakllantiradi. Bundan tashqari, u energetika obyektlarini qurish va ta’mirlashda mahalliy tovarlar va xizmatlardan foydalanishni rag‘batlantirish uchun javobgar bo‘ladi.
Bundan tashqari, 2030-yilgacha elektroenergetika sohasida bozor mexanizmlariga bosqichma-bosqich o‘tish konsepsiyasi tasdiqlanmoqda. U sanoatda raqobatni joriy etish va uning xususiy investitsiyalar uchun jozibadorligini oshirish maqsadida ishlab chiqilgan.
Konsepsiyaga muvofiq, elektr energiyasining ulgurji bozorida talab va taklifdan kelib chiqqan holda erkin narx belgilash joriy etiladi. Energiyani sotib olish va sotish maxsus onlayn platforma orqali amalga oshiriladi.
Shu bilan birga, aholi uchun elektr energiyasi tariflarini belgilashda ijtimoiy himoya mexanizmlarini joriy etilib, 2035-yilgacha barcha hududlarda yagona narx siyosati asosida elektr energiyasini sotish ta’minlanadi.
Konsepsiyaning asosiy yondashuvlaridan yana biri, energiya ta’minoti xizmatlari sifatini oshirish, uning uzluksizligi va barqarorligini ta’minlashdan iborat. Fuqarolar va korxonalarga energiya yetkazib beruvchilarni erkin tanlash imkoniyati yaratiladi.
Avvalroq Energetika vazirligi energiya narxini hozirgi darajada ushlab turish uchun budjetdan qancha mablag‘ sarflanishini hisoblab chiqqandi.
