UNWTO Bosh Assambleyasining 25-sessiyasi doirasida “O‘zbekiston temir yo‘llari” ishchi guruhi mamlakat turoperatorlari vakillari bilan uchrashdi. Bu haqda kompaniya matbuot xizmati xabar berdi.
Unda turoperatorlar o‘z xizmatlarini ko‘rsatishda duch kelayotgan muammolar muhokama qilindi. Asosiy masalalardan biri — poyezd chiptalari taqchilligiga qarshi kurashish maqsadida joriy etilgan “bitta pasport — bitta chipta” tizimi.
Endilikda boshqa mijozlar shaxsiy sabablarga ko‘ra sayohatni bekor qilsa, turoperatorlar boshqa yo‘lovchilar uchun chiptalarni qayta rasmiylashtira olmaydi. Ilgari turoperatorlar bitta pasport uchun sotib olingan barcha chiptalarni sayyohlarning yakuniy ro‘yxati asosida qayta rasmiylashtirishi mumkin edi.
Biroq, yangi qoidalar bunga yo‘l qo‘ymaydi. Mutaxassislarning ta’kidlashicha, chiptalarni sotishning belgilangan qoidalariga ko‘ra, faqat alohida hollarda chiptani boshqa shaxsga qayta rasmiylashtirish mumkin, lekin guruhlar uchun emas.
Uchrashuvda chiptalarni erta bron qilish muammosi ham muhokama markazida bo‘ldi. Hozirda temir yo‘l chiptalari jo‘nash kunidan 45 kun oldin sotuvga chiqariladi. Ko‘plab turistlar sayohatlarni chiptalar sotuvga chiqarilishidan ancha oldin rejalashtirishadi. Bu esa turoperatorlar uchun qiyinchiliklar tug‘diradi, deyiladi xabarda.
Shuningdek, temir yo‘l infratuzilmasini rivojlantirish masalalari muhokamasi ham uchrashuvning asosiy mavzularidan biri bo‘ldi. “O‘zbekiston temir yo‘llari” rahbariyati temir yo‘l tarmog‘ini modernizatsiya qilish va kengaytirish hamda qatnov sifati va qulayligini oshirish maqsadida yangi poyezdlarni xarid qilish va joriy etish bo‘yicha o‘z rejalari bilan tanishtirdi.
Uchrashuvda X.Rahmetov “O‘zbekiston temir yo‘llari” AJ sayyohlik kompaniyalari bilan hamkorlik aloqalarini saqlab qolish va mustahkamlashga tayyorligini bildirdi. Shuningdek, umumiy taklif va muammolarni muhokama qilish uchun muntazam yig‘ilishlar o‘tkazishni taklif qildi.
Avvalroq “O‘zbekiston temir yo‘llari” bitta pasport — bitta chipta tamoyilining yangi shartlari spekulyantlarga qarshi kurashishda yordam berishini ta’kidlagandi.
Joriy yilning 3-oktabr kuni mahalliy poyezdlarning chipta narxlari oshirilishi ma’lum qilindi. Xususan, 20-oktabrdan yo‘lovchi poyezdlari chipta narxlarining tarif qismi 50%ga, “Afrosiyob” elektropoyezdlari chiptalari esa 100%ga oshirilishi kerak edi. Biroq, narxlar hozircha o‘zgarishsiz qolmoqda.
Undan keyin, prezidentning tegishli qarori bilan, 2024-yildan tezyurar poyezdlarda yo‘lovchilarni tashish tariflari erkin belgilanishi ma’lum bo‘ldi.
