Lyuksemburgda bo‘lib o‘tgan Yevropa Ittifoqi va Markaziy Osiyo tashqi ishlar vazirlarining yig‘ilishi ishtirokchilari Rossiyaga qarshi sanksiyalarni chetlab o‘tishni muhokama qildi. Bu haqda “Kommersant” nashri xabar berdi.
“Bryussel sanksiyalarni chetlab o‘tishning oldini olish muhimligini ta’kidladi, Markaziy Osiyo davlatlari bu boradagi hamkorlikni davom ettirishga kelishib oldilar”, deyiladi qo‘shma bayonotda.
Bayonotda ta’kidlanganidek, Yevropa Ittifoqi yig‘ilish ishtirokchilarini Rossiyaga qarshi 11 ta sanksiyalar paketi haqida xabardor qildi, shuningdek, Yevropa Ittifoqining sanksiyalar rejimlari kontekstida natijalarga yo‘naltirilgan muloqot va hamkorlikning muhimligini ta’kidladi.
Yig‘ilishda Yevropa Ittifoqi davlatlari, O‘zbekiston, Qozog‘iston, Qirg‘iziston, Tojikiston va Turkmaniston tashqi ishlar vazirlari ishtirok etdi.
Bundan tashqari, Lyuksemburgda Yevropa Ittifoqi va Qozog‘iston hamkorlik kengashining yig‘ilishi bo‘lib o‘tdi.
“Hozirgi geosiyosiy kontekstda Yevropa Ittifoqi Qozog‘istonning sanksiyalarni chetlab o‘tishga qarshi kurashdagi hamkorligini yuqori baholadi va umumiy ustuvor tovarlar reeksportini to‘xtatish bo‘yicha sa’y-harakatlarni davom ettirish muhimligini ta’kidladi”, — deyiladi YeI Kengashi bayonotida.
Qozog‘iston o‘tgan haftada Qozog‘istondan Rossiyaga ikki maqsadli 106 turdagi tovarlarni eksport qilish mumkin emasligini ma’lum qilgan edi.
Rasmiylar ta’kidlashlaricha, ular yetkazib berishga taqiq o‘rnatmagan, ammo ular bilan savdo “xalqaro majburiyatlar va Qozog‘iston qonunchiligiga muvofiq” amalga oshirilishi kerak.
Avvalroq “Spot” Yevropa Ittifoqi Rossiyaga yordam berayotgani uchun O‘zbekiston kompaniyalariga sanksiya kiritishni rejalashtirayotgani haqida yozgandi.
Shuningdek, Yevropa komissiyasi O‘zbekistondan tashqari umumiy hisobda Xitoy, BAA, Armaniston, Eronning 35 dan ortiq kompaniyasiga sanksiya joriy qilishi mumkin.
