Makroiqtisodiy va hududiy tadqiqotlar instituti mutaxassislari 2023-yilning noyabr oyida Toshkentdagi yirik supermarketlarda 21 nomdagi oziq-ovqat mahsulotlari narxining o‘zgarishini ko‘rib chiqdi.
Xususan, 12-oktabr va 9-noyabr kunlari o‘tkazilgan monitoring natijalari 7 xil mahsulot bo‘yicha minimal narxlar o‘tgan oydagiga nisbatan pasayganligini ko‘rsatdi.
Shunday qilib, qizil sabzining narxi 42,1%ga, limon 39%, oq karam 16,7%, sut 14,9%, banan 12,3%, kungaboqar yog‘i 9,7% hamda kartoshka 6,4%ga pasaygan.
Bundan tashqari, 9 nomdagi mahsulotning eng past narxlari o‘zgarishsiz qolgan. Ularning orasida guruch, bug‘doy uni, shakar va boshqalar bor.
Tahlil 5 nomdagi mahsulot narxlari oshganini ham qayd etdi. Xususan, bodring va pomidor qimmatlashib, bu mavsumiy omil bilan bog‘lanmoqda.
Xuddi shunday dinamika o‘tgan yili ham kuzatilgan va bu ushbu hodisaning takrorlanishi va uning bozor tendensiyalariga ta’siridan dalolat beradi, deyiladi xabarda.
Avgust oyida Picodi.com tahlilchilari O‘zbekiston va dunyoning boshqa mamlakatlari aholisi oziq-ovqatga qancha pul sarflashini tahlil qilgandi. Mamlakat yashash uchun sarflanadigan xarajatlar eng yuqori bo‘lgan 10ta davlat qatoriga kiradi.
