“Amazon” sun’iy intellekt sohasida ko‘nikmalarga ega bo‘lish imkonini beruvchi bepul “AI Ready” o‘quv dasturini ishga tushirdi, deya xabar bermoqda “The Wall Street Journal”.
Qayd etilishicha, kompaniya mazkur dastur orqali 2025-yilgacha kamida 2 mln kishini o‘qitishni rejalashtirmoqda.
Darslar yangi boshlayotganlar uchun ham, ushbu sohada allaqachon tajribaga ega bo‘lganlar uchun mo‘ljallangan.
Ular asosiy va ilg‘or ko‘nikmalarga ega bo‘lishlari, jumladan, til modellari bilan ishlashda qo‘llaniladigan generativ sun’iy intellekt texnologiyalaridan foydalanishni o‘rganishlari mumkin.
Dastur sakkizta onlayn kursni o‘z ichiga oladi va “Amazon"ning o‘quv saytida hamma uchun ochiq hisoblanadi.
“AI Ready” tufayli “Amazon” kelajakda sun’iy intellekt sohasida o‘zini yangi iste’dodlar bilan ta’minlash va “Microsoft”, “Google” va sun’iy intellekt sohasida ham rivojlanayotgan boshqa kompaniyalar bilan bo‘shliqni yopish niyatida.
“Sun'iy intellekt bizning avlod duch keladigan eng o‘zgaruvchan texnologiya bo‘ladi, ammo bizda iste’dod bo‘lmasa, uning to‘liq salohiyati amalga oshirilmaydi”, dedi “Amazon"ning ma’lumotlar bazalari, tahliliy va mashinalarni o‘rganish bo‘yicha vitse-prezidenti Svami Sivasubramanian.
Shuningdek, u kompaniyaning asosiy maqsadlaridan biri generativ sun’iy intellekt bo‘yicha treningni demokratlashtirish ekanligini ta’kidladi.
Avvalroq “Spot” “Amazon” xavfsizlik uchun robot-qo‘riqchini taqdim qilgani haqida yozgandi.
U mustaqil ravishda yoki masofadan boshqarish pulti yordamida harakatlanishi mumkin. Qurilmaning narxi $2349ni tashkil etadi.
