O‘zbekistondagi xususiy kompaniyalar rahbarlari “PwC” konsalting kompaniyasi o‘tkazgan so‘rovnomada eng yaxshi biznes yetakchisi uchun ovoz berdi.
“PwC” kompaniyasining “CEO Survey” so‘rovi respublikada ikkinchi marta o‘tkazildi. Uning asosiy mavzusi mamlakat va jahonda ro‘y berayotgan voqealarning biznes jarayonlariga, rentabellik va xususiy sektor transformatsiyasiga ta’sirini tahlil qilish bo‘ldi.
Hammasi bo‘lib 38 ta mahalliy kompaniya rahbarlari o‘rtasida so‘rov o‘tkazildi. Ular orasida Andrey Dankov (Milk Euro Food), Kamran G‘ulomov (Central Asian University), Vatslav Garant (Air Products), Oybek Xalilov (Mosaic Insurance Group) va boshqalar bor.
2022-yil yakunlari bo‘yicha O‘zbekistondagi eng yaxshi bosh direktor deb ko‘pchilik respondentlar tomonidan “Korzinka” supermarketlar tarmog‘ini o‘z ichiga olgan “Anglesey Food” kompaniyasi asoschisi, “Newmax Technologies” (MyTaxi, Express24, Workly, Maxtrack) loyihalari hammuassisi, BookCafe, “TEAM” universiteti hammuassisi va Vasiylik kengashi a’zosi Zafar Hoshimov topildi.
So‘rov ishtirokchilari Hoshimovning strategik fikrlash qobiliyati, biznes yuritishda oqilona va uzoqni ko‘ra bilish, tez o‘zgarib borayotgan global tendensiyalar sharoitida qaror qabul qilishda moslashuvchanlik va tezkorlik kabi fazilatlarini qayd etdilar. Ular talabga ega bo‘lgan tovar va xizmatlarni o‘z vaqtida joriy etish imkoniyatini, shuningdek, tadbirkor kompaniyalarining mijozlarga yuqori e’tiborini ta’kidladilar.
2021-yilgi tadqiqotda ham Hoshimov mamlakatdagi eng yaxshi biznes rahbari sifatida tan olingan. Unda respondentlar moslashuvchanlikni, tegishli tovar va xizmatlarni o‘z vaqtida joriy etishni, shuningdek, iste’molchilarning unga bo‘lgan ishonchini ta’kidladilar.
Zafar Hoshimovning o‘zi moslashuvchanlik va tadbirkorlikni muvaffaqiyatli bosh direktorning asosiy fazilatlari deb atagan. U, shuningdek, uzoq muddatli o‘sish uchun barqarorlikka sodiqlik muhimligini ta’kidladi.
“PwC” “CEO Survey” tadqiqotining 2023-yilgi O‘zbekiston nashrini bu yerda ko‘rish mumkin.
Avvalroq “Spot” “Korzinka” Xalqaro moliya korporatsiyasidan $25 mln jalb qilishi haqida yozgandi.
Mazkur mablag‘lar tarmoqning yangi taqsimlash-tarqatuv markazi qurilishiga yo‘naltiriladi.
