O‘zbekistonda mandarinlarning ulgurji narxlari pasayishda davom etib, yilning shu davri uchun yangi eng past darajaga yetdi. Bu haqda “EastFruit” tahlillarida keltirilgan.
Joriy yilning 8-dekabridan 15-dekabrigacha mandarinning o‘rtacha ulgurji narxi bir kg uchun 10 mingdan 8 ming so‘mgacha, ya’ni oxirgi haftada 20%ga pasaydi.
Oxirgi ikki oyda mazkur mahsulotlarning ulgurji narxlari har hafta pasayib borayotgani hisobga olinsa, 20-oktabrdan 15-dekabrgacha mandarinning o‘rtacha ulgurji narxi 1 kg uchun 29 ming so‘mdan 8 ming so‘mgacha, ya’ni bu davrda 3,6 barobar arzonlashgan.
Shuningdek, 15-dekabr holatiga, mandarinning o‘rtacha ulgurji narxi o‘tgan yilning mos davriga nisbatan 27%ga va 2021-yilning shu sanasiga nisbatan uchdan biriga arzonroq.
Joriy yilning 20-oktabridan 10-noyabrigacha mandarinning o‘rtacha ulgurji narxi 29 ming so‘mdan 20 ming so‘mga pasaygandi.
Avvalroq “EastFruit” mutaxassislari O‘zbekistonda bodring narxi qimmatlashishda davom etayotganini qayd etgandi.
