Yevropa Ittifoqi Rossiyaga qarshi sanksiyalarning 12-paketini tasdiqladi. Bu haqda Yevropa komissiyasi saytida ma’lum qilingan.
Yangi paket Rossiyada ishlab chiqarilgan nosanoat olmoslarini, shu jumladan, tarkibida ular bo‘lgan zargarlik buyumlarini to‘g‘ridan-to‘g‘ri va bilvosita import qilish, sotib olishni taqiqlashni o‘z ichiga oladi. U 2024-yil 1-yanvardan kuchga kiradi.
Shuningdek, 2024-yil 1-martdan boshlab Rossiya olmoslari uchinchi mamlakatlarda kesilgan va sayqallangan bo‘lsa, ularni olib kirishga bosqichma-bosqich cheklovlar joriy etiladi. Taqiqni joriy etish jarayoni 2024-yil 1-sentabrgacha yakunlanadi.
Rossiyadan temir, quyma temir, mis va alyuminiydan tayyorlangan mahsulotlar, jumladan, sim, folga va quvurlarni import qilishda yiliga 2,2 mlrd yevro miqdorida cheklovlar joriy etilmoqda.
Ayrim kimyoviy moddalar, lityum batareyalar, termostatlar va boshqalarni olib kirish ham taqiqlangan.
Yevropa Ittifoqi eksportchilari endi o‘z shartnomalarida Rossiyaga reeksport yoki ayniqsa sezgir tovarlar va texnologiyalarni uchinchi mamlakatlarga sotish, yetkazib berish va o‘tkazishda foydalanish uchun reeksportni taqiqlashlari kerak (YeI hamkor davlatlari bundan mustasno). Ikki maqsadli tovarlarning Rossiyaga tranzitini taqiqlash kengaymoqda.
Rossiya fuqarolariga kriptovalyutalar bilan bog‘liq Yevropa kompaniyalarida yuqori lavozimlarni egallash taqiqlanadi.
Shuningdek, Yevropa Ittifoqida tashkil etilgan va ruslarga tegishli bo‘lgan yoki ularga tegishli bo‘lgan har qanday yuridik shaxs tomonidan YeIdan tashqariga pul o‘tkazmalari to‘g‘risida xabar berish majburiyatini kiritadi.
Yevropa Ittifoqi taqiqlangan shaxsiy tovarlarni olib kirish uchun ba’zi istisnolarni kiritdi. Bular sayohatchilar kiygan kiyim-kechaklari va gigiyena vositalari, shuningdek, bagaj.
Diplomatik ro‘yxatga olish raqamlari bo‘lgan avtomobillarga Yevropa Ittifoqiga kirishga ruxsat berilgan. Bundan tashqari, ittifoqqa a’zo davlatlar Rossiyada yashovchi YeI fuqarolariga avtomashinada kirishga ruxsat berish huquqiga ega — agar ular sotish uchun mo‘ljallanmagan bo‘lsa va shaxsiy maqsadlarda foydalanilsa.
Bundan tashqari, harbiy-sanoat va IT-sohasidan 140 nafar jismoniy shaxs va kompaniyaga nisbatan sanksiya qo‘llanilgan.
