Toshkent shahri hokimining 2024-yil 4-yanvardagi tegishli qarori bilan poytaxtda chiqindilarni olib chiqib ketish tariflari narxi oshdi.
Mazkur qaror bilan “Maxsustrans ishlab chiqarish boshqarmasi” tomonidan Toshkent shahrida qattiq maishiy chiqindilarni to‘plash va olib chiqib ketish xizmatlari uchun yangi tarif narxlari belgilandi.
Endilikda Toshkent shahrida qattiq maishiy chiqindilarni to‘plash va olib chiqib ketish xizmatlari uchun yangi tarif kishi boshiga bir oyda 7500 so‘m qilib belgilandi.
Budjet, yuridik shaxs va yakka tartibdagi tadbirkorlarga 1 metr kub chiqindi uchun yangi to‘lov miqdori 89 977 so‘mni tashkil qiladi.
Bundan tashqari 1 tonna suyuq va qattiq maishiy chiqindilarni olib chiqish bo‘yicha ko‘rsatiladigan xizmatlar uchun byudjet, yuridik shaxs va yakka tartibdagi tadbirkorlardan 188 ming 808 so‘m to‘laydi.
Eski narxdagi tarif bo‘yicha aholi uchun chiqindilarni olib chiqib ketish kishi boshiga bir oyda 4500 so‘m, budjet tashkilotlari va korxonalarga 53 986 so‘m edi.
Suyuq va qattiq maishiy chiqindilarni olib chiqish bo‘yicha ko‘rsatiladigan xizmatlar uchun narx budjet hamda xo‘jalik korxonalari uchun 20 174 so‘mni tashkil qilardi.
Bundan oldin Ekologiya vazirligi to‘rtta hududda qattiq maishiy chiqindilarni yig‘ish va olib chiqish xizmatlariga haq to‘lash bo‘yicha yagona tariflar joriy etilganini ma’lum qilgandi. Qayd etilishicha, so‘nggi to‘rt yil davomida narxlar o‘zgarmagan.
| Viloyat/hudud | Aholi uchun tariflar, so‘mda | Yuridik shaxslar uchun tariflar, so‘mda |
| Toshkent, viloyati | 4400 | 61 000 (QQS bilan 68 320) |
| Samarqand shahri va tumani | 5000 | 90 000, QQS bilan |
| Samarqandning boshqa tumanlarida | 4129 | 59 693, QQS bilan |
| Farg‘ona viloyati, shaharlar | 5000 | 48 000 (QQS bilan 53 760) |
| Farg‘ona viloyati, tumanlar | 4000 | |
| Andijon viloyati | 3500 | 47 500, QQS bilan |
