Rossiyaning “S7 Airlines” aviakompaniyasi Moskvadagi savdo bo‘limi, tijorat, moliya va iqtisodiy bo‘limlarda ekipaj a’zolari va ofis xodimlarini qisqartiradi, deb yozadi “Kommersant” nashri.
Unga ko‘ra, qisqartirishlar Moskvadagi ofis xodimlarining 13%iga (butun guruh xodimlarining taxminan 7%i) ta’sir qiladi.
2023-yilda “S7” Airbus A320 va A321neo dvigatellaridagi qiyinchiliklar tufayli qishki jadvalini qisqartirdi.
Qishgacha ushbu rusumdagi 39 ta samolyotdan 13 tasi ishlamay qolgan, ular Amerikaning “P&W” dvigatellari bilan jihozlangan.
Ular Rossiyada ta’mirlanmaydi va ikkilamchi bozorda ishlatilgan dvigatellarni sotib olish deyarli mumkin emas. Barcha jahon tashuvchilari ulardan foydalanishda muammolarga duch kelishmoqda.
Aviakompaniya “Kommersant” nashriga marshrut tarmog‘idagi o‘zgarishlar va Moskvadan bir qator yo‘nalishlarga parvoz dasturining qisqarishi sababli kompaniya parvoz ekipajlarini qayta taqsimlash va xodimlar sonini qisman qisqartirishga qaror qilganini aytdi.
Qayd etilishicha, Moskvadan kelgan ba’zi xodimlarga Novosibirsk yoki Irkutsk filiallarida ishlash taklif qilindi.
Uchuvchilar esa boshqa turdagi samolyotlarga, xususan Embraer 170 samolyotlariga qayta tayyorgarlik ko‘rishlari va kompaniyada ishlashni davom ettirishlari mumkin.
Shuningdek, ba’zi uchuvchilar va bortkuzatuvchilar “S7” tavsiyalari bo‘yicha boshqa aviakompaniyalarga, shu jumladan xalqaro aviakompaniyalarga ishga o‘tadilar.
Avvalroq “Spot” “S7 Airlines” aviakompaniyasi 5-maydan Irkutskdan Farg‘onaga parvozlarni tiklayotgani haqida yozgandi.
Aviaqatnovlar haftada bir marta — juma kunlari amalga oshirilishi rejalashtirilgan.
