Markaziy bank o‘tkazgan tadqiqotga ko‘ra, O‘zbekiston mehnat bozoridagi demografik yuk ortib bormoqda.
Joriy yil boshiga mamlakat aholisi 36,8 mln kishini tashkil etadi. 2020-yildan buyon o‘rtacha yillik o‘sish sur’ati 2010-yillardagi 1,7%ga nisbatan 2,1%ga tezlashgan. Bu esa aholining har yili 700−800 ming kishiga ko‘payishini bildiradi.
Aholining aksariyati mehnatga layoqatli yoshdagi guruhga to‘g‘ri keladi. Biroq, so‘nggi o‘n yil ichida uning ulushi bolalar hisobiga 61%dan 57%gacha kamaydi, bu ish o‘rinlarini yaratishga bo‘lgan ehtiyojning oshishiga olib kelishi mumkin.
2022-yilda iqtisodiy faol aholi soni 15 mlnga yaqin kishini tashkil etdi, bu 2016-yildagi ko‘rsatkichdan mlnga oshib ketdi. Ulardan 13,7 mln nafari ish bilan ta’minlangan — olti yil avvalgidan 400 ming nafarga ko‘p.
Bandlik vazirligi ma’lumotlariga ko‘ra, 2023-yilning birinchi yarmi yakunida ishsizlik darajasi 8,1%gacha pasaygan. Ish qidirish bilan bog‘liq so‘rovlar soni nisbatan barqaror, ammo poytaxt uchun o‘rtacha ko‘rsatkichdan yuqori.
Ishchi kuchiga bo‘lgan talab onlayn bo‘sh ish o‘rinlari soni orqali baholandi. Dekabr oyida u 49 mingdan oshdi va chakana savdo, sanoat, umumiy ovqatlanish va qurilish eng ko‘p ishchi kuchiga muhtoj.
2023-yil sentabr oyi oxirida o‘rtacha nominal ish haqi yil davomida 18%ga o‘sib, 4,4 mln so‘mni tashkil etdi. Daromadlar IT (44%), mehmonxona va restoran sektorlari (38%), transport (37%), savdo (32%) va moliya (30%)da tezroq sur’atlar bilan o‘sdi.
Oxirgi besh yilda sanoat va transportda mahsuldorlikning tez o‘sishi, qishloq xo‘jaligi va savdoda o‘rtacha o‘sish kuzatildi. Shu bilan birga, 2023 yilda qurilishda unumdorlik biroz pasaygan.
Avvalroq o‘zbekistonliklar ish beruvchini qaysi asosiy mezonlarga ko‘ra tanlashi haqida ma’lumot berilgandi.
