“Humans Group” “Humans Market” mahsulot bozorini ishga tushirdi. Bu haqda kompaniya matbuot xizmati “Spot"ga ma’lum qildi.
Hozirda bozor ikki toifani o‘z ichiga oladi: “Artel” elektronika bozori do‘koni va “Humans Yaxshi” oziq-ovqat mahsulotlarini yetkazib berish xizmati.
“Humans Yaxshi” Chorsu bozoridan mahsulotlar yetkazib berishni taklif etadi. Birinchi bosqichda bu yerda 5 ming turdagi tovar, jumladan, 3 ming turdagi oziq-ovqat mahsulotlarini xarid qilish mumkin.
Kelgusida xizmat buyurtma berish mumkin bo‘lgan bozorlar va supermarketlar ro‘yxatini kengaytiradi.
To‘lov vaqtida savdo nuqtasiga biriktirilgan xaridorlar “Telegram” botidan push-bildirishnoma va xabar oladi.
Sotuvchi mahsulotlarni yig‘ishni va qadoqlashni boshlaydi, shundan so‘ng u buyurtmani “yig‘ilgan” holatiga o‘tkazadi.
Keyinchalik, kuryer buyurtmaning to‘liq to‘plamini tekshiradi va uni “yetkazib berish” holatiga o‘tkazadi. Mijoz tovarlarni qabul qilganda, “yetkazib berildi” holati paydo bo‘ladi.
Uchinchi tomon sotuvchilari uchun platformaga kirish yaqin kelajakda ochiq bo‘ladi. Sotuvchilar uchun ro‘yxatdan o‘tish va tekshirish bepul bo‘ladi.
“Humans Business” platformasi orqali 15 daqiqada onlayn-do‘kon yaratish mumkin.
Yirik do‘konlar ham, yakka tartibdagi tadbirkorlar ham “Humans Market"da 3PL modelidan foydalangan holda, vositachilarsiz — mahsulotlar ro‘yxatini va narxlarni mustaqil belgilagan holda savdo qilishlari mumkin bo‘ladi.
Sotuvchilar xaridorlarga tovarlarni yetkazib berish variantlaridan birini taklif qilishlari mumkin — o‘z xodimlari, “Yandex Go” kuryerlari, “Humans” xodimlari yoki do‘kondan olib ketish.
Sotuvchilar uchun komissiya o‘rtacha 10% ni tashkil qiladi. Ulardan 5% platformaning daromadi bo‘ladi, qolgan qismi esa xaridorga keshbek sifatida qaytariladi.
“Bu safar biz xaridorlar va sotuvchilarni bog‘laydigan, vositachilarni yo‘q qiladigan xizmatni yaratdik. „Humans Market“ marketpleysi bilan har qanday sotuvchi onlayn biznesni ochish, veb-saytlarni ishlab chiqish va marketingga katta mablag‘ sarflamasdan tovarlarni onlayn sotishi mumkin bo‘ladi”, — deya qo‘shimcha qildi “Humans Group” asoschisi Vladimir Dobrinin.
Avvalroq “Spot” “Humans"ning 2023-yildagi daromadi $40 mlndan oshganini yozgandi.
