Markaziy bank O‘zbekistonda kafolatlar berish tashkilotlari faoliyatiga ruxsat berishni rejalashtirmoqda. Bu haqda regulyatorning 19-mart kuni mikrobiznes, kichik va o‘rta korxonalarni moliyalashtirish bo‘yicha seminarda taqdim etilgan taqdimotida aytiladi (“Spot"da mavjud).
Qayd etilishicha, kafillik tashkilotlari aksiyadorlik jamiyatlari huquqiy shaklida faoliyat yuritadi. Eng kam ustav kapitali 100 mlrd so‘mni tashkil etadi.
Kafolat beruvchi tashkilotlarning ijrochi direktori oliy iqtisodiy ma’lumotga, shuningdek, bank yoki moliya sohasida kamida besh yil, shu jumladan, uch yillik rahbarlik lavozimlarida ish stajiga ega bo‘lishi talab qilinadi.
Shuningdek, buxgalterlar iqtisod bo‘yicha oliy ma’lumotga, buxgalteriya hisobi yoki audit bo‘yicha uch yillik tajribaga ega bo‘lishlari kerak.
Kafolatlar berish tashkilotlari quyidagi prudensial standartlarga bo‘ysunadilar:
- likvidlilik;
- kapitalning yetarlilik koeffitsientlari;
- qarz oluvchiga yoki o‘zaro aloqador qarz oluvchilar guruhiga tavakkalchilikning eng ko‘p miqdori;
- kafolatlar berish tashkilotiga aloqador bo‘lgan shaxslar uchun tavakkalchilikning eng ko‘p miqdori;
- yuridik shaxslarning ustav kapitaliga va qarz qimmatli qog‘ozlariga investitsiyalarning maksimal miqdori.
Kafolat berish tashkilotlari jismoniy shaxslarning kredit tashkilotlari oldidagi moliyaviy majburiyatlarini bajarish uchun kafolat (kafillik) beradi.
O‘z navbatida, yuridik shaxslarning ta’sischilari va xodimlaridan tashqari yiliga besh martadan ortiq kafolat (kafillik) olishlari mumkin bo‘ladi.
Avvalroq “Spot” Markaziy bank mikromoliya banklari faoliyatiga ruxsat berishni rejalashtirayotgani haqida yozgandi.
Mazkur kredit tashkilotlari uchun ustav kapitali miqdori 50 mlrd so‘mdan 500 mlrd so‘mgacha belgilanadi.
