O‘zbekistonliklar Germaniyaga ishga taklif etilmoqda. Bu haqda Migratsiya agentligi matbuot xizmati xabar berdi.
Fuqarolar mamlakat mehmonxonalarida amaliyot o‘tash yoki ishlash imkoniyatiga ega bo‘ladilar.
Nomzodlar turizm, mehmonxona yo‘nalishlarida kasb-hunar kolleji, texnikum yoki oliygoh diplomiga ega bo‘lishlari kerak.
Mehmonxona xizmatlari bo‘yicha tajriba va nemis tilidan kamida B1 sertifikat talab qilinadi.
Shuningdek, ariza beruvchilar 20−30 yosh oralig‘ida, sudlanmagan hamda jismonan sog‘lom bo‘lishlari zarur.
Ish haqi oyiga 1800 yevro (soliqlar ushlangandan keyin). Sinov muddati 3 oyni tashkil etadi.
Qabul qilinganlar Germaniya aeroportidan ish joyigacha bo‘lgan manzilga olib boriladi hamda turar-joy topishga yordam beriladi.
Nomzodlar 15-aprel kuni, soat 18:00gacha havola orqali ro‘yxatdan o‘tishlari mumkin.
Batafsil ma’lumot bu yerda.
Avvalroq o‘zbekistonliklar Germaniyaga avtomobilsozlik sohasiga ishga taklif etilayotgani haqida xabar berilgandi.
