“Tesla” butun dunyo bo‘ylab xodimlarining 10% dan ortig‘ini ishdan bo‘shatadi, deya xabar berdi “Electrek” kompaniyaning maktubiga tayanib.
“Ushbu sa’y-harakatlarning bir qismi sifatida biz tashkilotni har tomonlama ko‘rib chiqdik va butun dunyo bo‘ylab xodimlar sonini 10%dan ko‘proq qisqartirish bo‘yicha qiyin qaror qabul qildik. Men uchun bundan nafratlanadigan narsa yo‘q, lekin buni qilish kerak”, — dedi “Tesla” bosh direktori Ilon Mask kompaniya xodimlariga yo‘llagan maktubida.
Maskning maktubida aytilishicha, “Tesla” tez o‘sishi natijasida kompaniya “ba'zi sohalarda rollar va lavozim funksiyalarining takrorlanishini boshdan kechirgan” va qisqartirishlar kompaniyaga “keyingi o‘sish bosqichi sikliga” tayyor bo‘lishga imkon beradi.
“Electrek” ma’lumotlariga ko‘ra, qisqartirishlar taxminan 14 000 xodimga ta’sir qiladi, chunki “Tesla"da jami 140 000 ishchi kuchi mavjud.
2-aprel kuni “Tesla” har choraklik savdo hisobotlarini e’lon qildi. Shunday qilib, 2024-yilning birinchi choragida kompaniya 386 810 ta elektromobil yetkazib berdi, bu o‘tgan yilning shu davriga nisbatan 8,5%ga kamdir.
3-aprel kuni kompaniya aksiyalari hisobot fonida arzonlashdi va Amerikaning “Nasdaq” birjasida har bir aksiya uchun $167,5dan sotildi, bu $150lik qo‘llab-quvvatlash darajasiga yaqin.
Avvalroq “Spot” “Tesla” elektromobillar sotuvi bo‘yicha yana “BYD"dan o‘zib ketgani haqida yozgandi.
Tesla’ning choraklik savdosi 386,8 mingtani tashkil etgan bo‘lsa, BYD esa 300 mingta elektromobil sotgan.
