“Tesla” yana bir qator yirik bozorlarda, shu jumladan AQSh, Xitoy va Germaniyada avtomobillar narxlarni pasaytirdi. Bu haqda “BBC” nashri xabar berdi.
Ushbu harakat kompaniya joriy yilning dastlabki uch oyida butun dunyo bo‘ylab avtomobil yetkazib berish keskin pasaygani haqida xabar berganidan keyin amalga oshirildi.
Elektr avtomobil ishlab chiqaruvchilari o‘rtasidagi narx urushi kuchayib bormoqda. Xitoy kompaniyalari ayniqsa jiddiy raqobatni keltirib chiqaradi.
“Tesla” 2024 yilning birinchi choragidagi moliyaviy natijalarini AQSh bozori shu hafta yopilgandan keyin e’lon qilishi rejalashtirilgan.
“Ishlab chiqarish darajasini talab darajasida ushlab turish uchun „Tesla“ narxlari tez-tez o‘zgarishi kerak”, dedi Ilon Mask “X” (avallagi Twitter)dagi sahifasida.
“Tesla” bir yildan ko‘proq vaqt oldin, rentabellik hisobiga narxlarni agressiv ravishda pasaytirib, elektr transport vositalariga narxlar urushini keltirib chiqardi.
Kompaniya o‘zining eskirgan modellarini yangilashni sekinlashtirmoqda, “BYD” va “Nio” kabi Xitoydagi raqiblar esa arzonroq modellarni chiqarishmoqda.
Xitoyning smartfon ishlab chiqaruvchi “Xiaomi” kompaniyasi ham o‘tgan oy o‘zining ilk elektromobilini taqdim etdi.
Yaqinda kompaniya o‘zining 3800dan ortiq “Cybertruck” elektromobilini xavfsizlik muammolari tufayli chaqirib olishi haqida xabar berilgandi.
Ularning gaz pedali yostiqchasi maksimal holatda qoplamaga yopishib qolishi va elektr transport vositasining haydovchi uchun kutilmaganda tezlashishiga olib kelishi mumkin.
Avvalroq “Spot” “Tesla” butun dunyo bo‘ylab xodimlarining 10%dan ortig‘ini ishdan bo‘shatishi haqida yozgandi.
Ma’lumotlariga ko‘ra, qisqartirishlar kompaniyaning taxminan 14 000 nafar xodimga ta’sir qiladi.
