Avvalroq hukumatda yashirin iqtisodiyotga qarshi kurashish bo‘yicha qaror loyihasi muhokama qilinayotgani haqida xabar berilgandi.
Hujjat bilan soliq ma’muriyatchiligi jarayonlariga bir qator o‘zgartirishlar kiritilmoqda. Xususan, 1-iyuldan soliq organlari xodimlariga korxonalar hududiga kirish va binoni ko‘zdan kechirish vakolatini berish rejalashtirilgan.
Agar mazkur tadbirlar davomida quyidagilar aniqlansa, soliq organlari oldindan xabardor qilmasdan va Biznes ombudsmanni tekshirish kunida xabardor qilgan holda belgilangan tartibda sayyor tekshiruvlarni o‘tkazishlari mumkin:
- to‘lov intizomi, shu jumladan nazorat-kassa texnikasidan foydalanish yoki fiskal chek berish tartibini buzish;
- ishchi xodimlar sonini yashirish;
- yer qa’ridan foydalanishda soliq qonunchiligini buzish.
Yirik soliq to‘lovchilar bo‘yicha inspeksiya yillik aylanmasi 170 mlrd so‘mdan ortiq bo‘lgan korxonalar bilan shug‘ullanadi. Paxta-to‘qimachilik klasterlari, to‘qimachilik va “sharov savdo” korxonalari ma’murchiligi hududiy soliq boshqarmalariga o‘tkaziladi.
Bundan tashqari, to‘lanishi lozim bo‘lgan bojxona to‘lovlarini kamaytirib ko‘rsatganlik uchun javobgarlik joriy etilishi ko‘zda tutilgan. Quyidagi harakatlar majburiyat summasining 20%i miqdorida jarima solishga sabab bo‘ladi:
- tovarlarni deklaratsiyamaslik yoki noto‘g‘ri deklaratsiyalash natijasida bojxona to‘lovlari to‘liq to‘lanmasa yoki miqdori kamaytirilsa;
- imtiyozli tovarlardan boshqa maqsadlarda foydalanish yoki tasarruf etish tartibi buzilsa;
- tovarlar shartli chiqarib yuborilgan vaqtdan uch yil ichida boshqa maqsadlarda foydalanganda.
2023-yil oxirida ayrim qonun hujjatlariga kiritilgan o‘zgartirish va qo‘shimchalar bilan kameral soliq tekshiruvida soliq nazorati tadbirlarini o‘tkazish taqiqlangandi.
Joriy yilning martidagi hukumat qarori bilan kameral tekshiruvlarni o‘tkazishda soliq organlarining ayrim huquqlari bekor qilindi.
