Avvalroq O‘zbekistonda energiya samaradorligini oshirishga qaratilgan yangi rejalar belgilangani haqida xabar berilgandi.
Yuridik shaxslar uchun elektr energiyasi va tabiiy gaz iste’moli koeffitsientlarini oshirish rejalashtirilmoqda. Bu haqda Energetika vaziri Jo‘rabek Mirzamahmudov “O‘zbekiston 24” telekanaliga bergan intervyusida ma’lum qildi.
2024−2025 yillar kuz-qish mavsumi har bir hudud, har bir tuman va shahar, mahallabay kesimida ham elektr energiyasi, ham tabiiy gazni tejash bo‘yicha ko‘rsatkichlar belgilandi.
Vazirning qayd etishicha, buni ta’minlash borasida ta’sirchan choralar ko‘rish, normativ hujjatlarga tegishli o‘zgartirishlar kiritish nazarda tutilgan.
“Avvallari ushbu ko‘rsatkichlar belgilanardi, lekin bu ko‘rsatkichlarni bajarmagan korxona yoki tashkilot rahbarlariga nisbatan chora ko‘rishning imkoni bo‘lmasdi. Endi moddiy va boshqa javobgarlikka tortish choralarini qo‘llash bo‘yicha topshiriqlar berildi”, — dedi u.
Iste’molchilar tomonidan elektr va gazdan foydalanish qoidalarini buzganlik uchun amaldagi tarifga o‘suvchi koeffitsientni qo‘llagan holda qayta hisob-kitob qilish tartibi belgilanishi kutilmoqda.
Qo‘shimcha ravishda me’yorlar belgilanadi, ya’ni gaz yoki elektr energiyasi iste’moli belgilangan limitning 10%idan oshsa, ortiqcha iste’mol qilingan hajmga nisbatan 2 baravargacha tarif qo‘llaniladi.
“Bu, avvallo, nimaga qaratilgan? Bu hozirda tobora qimmat bo‘lib borayotgan energiya resursini tejash, chunki, importdan keltirilayotgan va boshqa resurslar mavjud. Iqtisodiyotimizda energiya samaradorligini maksimal darajada oshirishga erishish zarur”, — dedi u.
Buning uchun davlat tashkilotlarida energiya samaradorligi bo‘yicha alohida ko‘rsatkichlar (KPI) o‘rnatiladi va ularning bajarilishiga qarab, rag‘batlantirish mexanizmlari ham ta’minlanadi.
Energetika vazirligining “Gazeta.uz"ga aniqlik kiritishich a, mazkur tartib yuridik shaxslar (xususiy tadbirkor, davlat korxonalari va tashkilotlari) uchun joriy etiladi. Masalan, korxona yoki davlat tashkiloti 100 kVt/soat shartli chegaraga ega, ammo iste’mol 120 kVt / soatga yetdi. Ikki tomonlama tarif 10 kVt/soat uchun amal qiladi.
Tashkilotlar, hududlar va ko‘chmas mulk obyektlari kesimida energiya iste’moli reytingini joriy etish belgilandi. Energetika vazirligi energiya sig‘imi eng yuqori va eng past bo‘lganlarning “10 taligi"ni yuritadi.
Jo‘rabek Mirzamahmudov 1-maydan tariflar oshirilishi elektr va gaz iste’molini kamaytirganini ma’lum qildi. Quyosh va shamol elektr stansiyalarida ishlab chiqarish hajmi o‘tgan yilga nisbatan 700 mln kVt/soatdan oshgan.
