O‘zbekiston fuqarolari Moskvaning Sheremetevo aeroporti orqali Rossiyaga kirishda aeroport xizmatlarining “qo‘shimcha va o‘ta uzoq davom etgan tekshiruvlari” tufayli muammolarga duch kelishmoqda. Bu haqda “Vedomosti” nashri xabar berdi.
Vaziyatga oydinlik kiritish uchun O‘zbekistonning Moskvadagi elchixonasi Rossiya Tashqi ishlar vazirligiga murojaat yubordi, deyiladi diplomatik missiya xabarida.
“Elchixona Sheremetevo aeroportidagi chegara nazorati xizmati bilan doimiy aloqada”, — deya qo‘shimcha qildi O‘zbekiston elchixonasi.
Moskvadagi o‘zbek diasporasi rahbari Bahrom Ismoilov “Vedomost"ga tashkilot doimiy ravishda O‘zbekiston fuqarolaridan tranzit zonasida bo‘lishning og‘ir sharoitlari va Rossiyaga kirishga ruxsat berilmaganlar uchun oziq-ovqat yetishmasligi haqida shikoyat qilgan videoni olishini aytdi.
Uning so‘zlariga ko‘ra, bu ikkinchi haftada davom etmoqda va mamlakat fuqarolari bir necha kun tranzit zonasida bo‘lishlari mumkin.
“Oxirgi marta 500ga yaqin odam uch kun davomida u yerda bo‘lgan”, dedi u o‘z tahminlarida.
Ismoilovning ta’kidlashicha, aeroportda O‘zbekistondan parvoz qilgan yo‘lovchilarning o‘rtacha 20%i ushlab turilgan.
Chegara nazoratidan o‘tish bilan bog‘liq muammolar haqida migratsiya sohasidagi ekspert Vadim Kojenov ham ma’lum qilgan.
Uning so‘zlariga ko‘ra, bunday murojaatlar kelib tushgan, hujjatlarni tekshirish besh-olti soatdan ko‘p bo‘lmagan.
Aeroportda yo‘lovchilarni tekshirish o‘rtacha bir yarim soatdan oshmaydi, dedi Rossiya Tashqi ishlar vazirligi matbuot kotibi Mariya Zaxarova “Vedomosti"ga Rossiya FSB chegara xizmati ma’lumotlariga tayanib.
Ularning davomiyligi obyektiv omillar, jumladan, nazorat-o‘tkazish punktlarini tartibga solish va yo‘lovchi tashish hajmi bilan bog‘liq.
Uzoqroq kechikishlar Rossiyaga kirish taqiqlanganlarga tegishli, deya qo‘shimcha qildi Zaxarova.
Umuman olganda, 2024-yil boshida Rossiyada 10,7 mlnga yaqin chet el fuqarolari bo‘lgan, ulardan 7,7 mlni (72%i) mehnat muhojirlari, Vedomosti may oyida Rosstat, Ichki ishlar vazirligi ma’lumotlari va ekspert baholashlari asosida hisoblab chiqdi.
O‘zbekiston mehnat muhojirlarining kirib kelishi bo‘yicha birinchi o‘rinda turadi. 2023-yilda mamlakat fuqarolari Rossiya chegarasini qariyb 2 mln marta kesib o‘tgan. Ikkinchi o‘rinda Tojikiston (1,2 mln kelgan), uchinchi o‘rinda Qirg‘iziston (720 ming kishi).
19-iyun kuni Rossiya Ichki ishlar vazirligining rasmiy vakili Irina Volk joriy yil boshidan buyon 30 mingdan ortiq xorij fuqarosi Rossiyadan chiqarib yuborilganini ma’lum qildi.
Bundan tashqari, politsiya 100 ming xorijlik uchun kirishni taqiqlagan. Bu o‘tgan yilning shu davriga nisbatan 55%ga ko‘pdir.
