Mark Sukerberg 40 yoshga to‘lganligi munosabati bilan o‘ziga $300 mlnlik hashamatli yaxta sotib oldi, deya xabar berdi “El País”.
Qayd etilishicha, milliarder o‘zining yangi yaxtasida O‘rta Yer dengizida joylashgan Mayorka orollar yaqinidagi Balear dengizida dam olmoqda.
Yangi “Launchpad” yaxtasining uzunligi 118 metr va eni 15 metr bo‘lib, uni Monakoda joylashgan “Espen Øino International” kompaniyasi loyihalashtirgan va Gollandiyaning “Feadship” kompaniyasi ishlab chiqargan.
U 24 nafar mehmon va 48 nafar ekipaj a’zolarini sig‘dira oladi. Yaxta 20 uzelgacha tezlikka erishadi va $300 mln turadi.
Kema oq va to‘q ko‘k rangdagi uchta palubaga ega, kamonda tennis korti, orqa palubasida esa materikdan mehmonlarni tashiydigan vertolyot bor. Dengiz bo‘yida ovqatlanish uchun oynali terrasa ham mavjud.
Avvalroq “Spot” Mark Sukerberg Gavayida $270 mlnlik maxfiy yerosti bunkeri qurayotgani haqida yozgandi.
Qayd etilishicha, 560 gektar maydondagi majmuada 12 dan ortiq bino va yer osti boshpanasi quriladi. Majmua energiya, suv va oziq-ovqatning o‘ziga xos zaxiralariga ega bo‘ladi.
