Hukumatning ayrim qarorlariga avtomobil yo‘llarida harakat xavfsizligini ta’minlashga qaratilgan o‘zgartirish va qo‘shimchalar kiritish to‘g‘risida Vazirlar Mahkamasi qarori qabul qilindi.
Hujjat bilan Yo‘l harakati qoidalariga elektromototsikl, skuter va individual harakatlanish vositalarida harakatlanish tartibi, bu kabi transport vositalarini boshqarish uchun yosh chegarasini hamda haydovchilik guvohnomasini olish talabi belgilandi.
2024-yilning 1-avgustidan boshlab ro‘yxatdan o‘tkazish davlat raqami belgilari YHXXning Yagona avtomatlashtirilgan axborot tizimidagi “Davlat raqam belgilari” modulida avtomatik tarzda tasodifiy tanlash yo‘li bilan beriladi.
Tez tibbiy yordam mashinalari, elektromototsikllar, mopedlar va skuterlar uchun alohida davlat raqamlari joriy etilmoqda.
Xususan, “I2 tip — STY” seriyali davlat raqami tez tibbiy yordam avtomobillariga, “IE2 tip — “STY” seriyali raqami belgilari esa ular harakatlanuvchi elektromobillar va gibrid avtomobillarga beriladi.
Mopedlar va skuterlar uchun litsenziya raqamlari (XI1 va XIE1 turlari) kvadrat shaklga ega va mototsikl raqamlariga o‘xshash dizaynga ega bo‘ladi. Shu bilan birga, ular yuqori qatorda 3ta raqam va pastki qatorda 3ta harfga ega bo‘ladi (mototsikllar uchun — 3ta raqam va 2ta harf).
Mopedlar uchun XI1 turi va skuterlar uchun XIE1 turi (hudud kodi maydonida yashil fon bilan) chiqariladi. XIE tipidagi belgilar faqat elektromototsikllar uchun ajratilgan.
Norezidentlarga tegishli avtotransport vositalari uchun sariq fonli maxsus raqamlar (avtomobillarga o‘xshash) joriy etiladi. Mototsikllarning davlat raqamlari 000 HH, mopedlar va skuterlar — 000 HHH formatida bo‘ladi.
Mopedlar va skuterlar, shuningdek, mototsikllarning orqa tomonida faqat bitta raqam bo‘ladi. Ichki ishlar vazirligi va Texnik jihatdan tartibga solish agentligiga uch oy muddatda yangi avtomobil raqamlari uchun normativ hujjatlarni belgilash topshirildi.
Skuterlar va mopedlarning harakatlanishini (3.5.1), shuningdek, individual harakatlanish vositalarini boshqarishni (3.34) taqiqlovchi yangi yo‘l belgilari quyidagicha bo‘ladi:
Ichki ishlar vazirligi moped va skuterlarni vaqtincha davlat ro‘yxatidan o‘tkazish tartibini tasdiqlash to‘g‘risidagi qaror loyihasini ishlab chiqqandi.
Undan keyin Qonunchilik palatasi deputatlari Ma’muriy javobgarlik to‘g‘risidagi kodeksiga o‘zgartirish va qo‘shimchalar kiritishga qaratilgan qonun loyihasini ko‘rib chiqishdi. Unda skuter va mopedlarda yo‘l harakati qoidalarini buzganlik uchun javobgarlik belgilash nazarda tutilgandi.
