Avtomobil raqamlari tasodifiy tanlash yo‘li bilan beriladi
Ro‘yxatdan o‘tkazish davlat raqami belgilari YHXXning Yagona avtomatlashtirilgan axborot tizimidagi “Davlat raqam belgilari” modulida avtomatik tarzda tasodifiy tanlash yo‘li bilan beriladi.
Hozirda raqam belgilari o‘sib boruvchi raqamlash ketma-ketligi bo‘yicha beriladi, harflar va raqamlar kombinatsiyasiga ega bo‘lgan auksion orqali sotilgan raqamlar bundan mustasno.
Elektr energiyasini hisoblash bo‘yicha yangi billing tizimi ishga tushiriladi
O‘zbekistonda elektr energiyasini hisoblashning yangi billing tizimi joriy etiladi. Tizim sinov tarzida Toshkent shahrining Yakkasaroy tumanida yo‘lga qo‘yilgan bo‘lib, 1-avgustdan mamlakat hududlarida ishga tushiriladi.
Amaldagi tizimda abonentning ism-familiyasi, pasport ma’lumotlari va hisob-raqami bo‘lgan bo‘lsa, yangi tizimda abonentning kadastr ma’lumotlari, bitta odam nomida nechta hisob raqami borligi kabi ma’lumotlar ham bo‘ladi.
Shuningdek, yangi tizimda monitoring ishlarini olib borish maqsadida iste’molchining shikoyat va takliflari, ularning soni yozib boriladi.
Tizimning mobil ilovasi ham ishlab chiqildi. U orqali amalga oshirilgan to‘lovlar hamda iste’mol qilingan elektr energiyasi miqdorini onlayn olish mumkin.
Tibbiy chiqindilardan energiya ishlab chiqariladi
Tibbiyot chiqindilaridan muqobil issiqlik energiyasini ishlab chiqarish uchun barcha turdagi tibbiyot muassasalarida hosil bo‘ladigan tibbiyot chiqindilari to‘liq hajmda “Sayar Green” kompaniyasiga topshiriladi.
Kompaniya tomonidan ishlab chiqarilgan issiqlik energiyasi tasdiqlangan tariflarda tibbiyot muassasalari tomonidan sotib olinadi. Bunda issiqlik energiyasi boshqa shaxslarga ham belgilangan tartibda yetkazib berilishi mumkin. Hozircha tarif stavkalariga aniqlik kirtilmagan.
Loyiha amalga oshiriladigan hududlarda joylashgan tibbiyot muassasalari tibbiy chiqindilarni kompaniyaga to‘liq yetkazib berishi kerak.
Master-reja hududidagi yerlar auksionga chiqariladi
2024-yilning 1-avgustidan yil yakunigacha belgilangan master-rejalarga muvofiq, mazkur hududdagi yer uchastkalari auksionga chiqariladi.
Bu yerlar xizmat ko‘rsatish majmualari va servis obyektlarini, jumladan joylashtirish vositalari, turar joylar, savdo-ko‘ngilochar markazlarini tashkil qilish uchun ajratiladi.
“Agroplatforma” axborot tizimida xizmatlar pullik ko‘rsatiladi
1-avgustdan “Agroplatforma” axborot tizimidan xizmatlar pullik asosda ko‘rsatila boshlanadi.
Foydalanuvchilardan olinadigan abonent to‘lovi evaziga tizimning 24/7 uzliksiz rejimda ishlashini ta’minlash, texnik-qo‘llab quvvatlash, takomillashtirib borish xizmatlarini tijoratlashtirish rejalashtirilgan.
Ta’rif to‘lovlari bo‘yicha ma’lumotlarni “Agroplatforma” hamda tizimga joylashtirilgan “Ommaviy oferta"dan olishi mumkin.
Raqamli kriminalistika ilmiy-tadqiqot instituti sud ekspertizalarini o‘tkazadi
Akademiyaning Raqamli kriminalistika ilmiy-uslubiy markazi negizida Raqamli kriminalistika ilmiy-tadqiqot instituti tashkil etilishi belgilangan.
1-avgustdan institutga raqamli kriminalistika bo‘yicha sud ekspertizalari va tadqiqotlarini o‘tkazish huquqi beriladi.
Institut sud-ekspertlik faoliyati qamrovini kengaytirish maqsadida 2024-yil yakunigacha katta hajmdagi ma’lumotlar ekspertizasi o‘tkazilishini yo‘lga qo‘yadi.
Seysmik faol zonalarda ko‘p qavatli binolar seysmik himoya bilan quriladi
Mamlakatning barcha tuman va shaharlari hududlari kesimida mintaqaviy akselerogrammalar raqamlashtirilib, onlayn bazalari shakllantirilishi belgilangan.
1-avgustdan xavflilik omili III — IV toifa bo‘lgan obyektlarni hududning zilzilalar kuchini ko‘rsatib beruvchi mintaqaviy akselerogrammalar bazalaridan kelib chiqib loyihalash va qurish tartibi joriy etiladi.
Modulli mehmonxonalar tasnifi joriy etiladi
“Turizm sohasida standartlashtirish” texnik qo‘mitasi tomonidan “Turizm xizmatlari. Modulli mehmonxonalar. Tasniflash tizimi” milliy standarti ishlab chiqildi.
Modulli mehmonxonalarni toifalar bo‘yicha tasniflashda binolar va xonalarning texnik jihozlanishi, sanitariya-gigiyena sharoitlari, mebellar, jihozlar, jamoat joylari, xodimlarni o‘qitish kabi talablarga tayaniladi.
Toifalar uchta “I”, “II”, va “III” toifa bo‘yicha tasniflanadi. Eng yuqori toifa “I” (birinchi), eng past “III” (uchinchi) toifa hisoblanadi.
Masalan, barcha modulli mehmonxonalar o‘z xonalarida Wi-Fi bo‘lishi kerak, I toifadagi mehmonxonalar uchun esa umumiy joylarida ham bo‘lishi shart. Bundan tashqari, yuqori toifadagi mehmonxonada elektr generatori va issiq suv ta’minoti bo‘lishi kerak.
