Rossiyada ish stoli kompyuterlarida “YouTube"ni yuklab olish tezligi shu hafta oxirigacha 40%ga, keyingi hafta oxiriga kelib esa 70%ga tushadi. Bu haqda Rossiya Davlat dumasi deputati Aleksandr Xinshteyn o‘zining “Telegram” kanalida ma’lum qildi.
Chora faqat ish stoli versiyalariga ta’sir qiladi, hozircha mobil qurilmalar ta’sir qilmaydi. Rasmiy ravishda, bu “Google” kontentini keshlash serverlarining ishlashi bilan bog‘liq muammolar bilan izohlanadi.
“„YouTube“ tezligining „pastlanishi“ rossiyalik foydalanuvchilarga emas, balki xorijiy resurs ma’muriyatiga qarshi qaratilgan majburiy qadamdir”, — dedi Xinshteyn.
Platforma Rossiya qonunchiligini muntazam ravishda buzish va mahalliy hokimiyat talablarini mensimaslikda ayblanmoqda.
“Roskomnadzor” ma’lumotlariga ko‘ra, videoxosting Ukrainadagi harbiy maxsus operatsiya haqidagi soxta materiallar, ekstremistik materiallar va boshqalarni o‘z ichiga olgan 60 mingdan ortiq videolarni o‘chirib tashlamaydi.
Deputat, shuningdek, platformaning ishini sekinlashtirish uchun yoz vaqti alohida tanlanganini, bu vaqtda aholining ko‘pchiligi ta’tilga chiqqani va internetga kirish uchun mobil qurilmalardan foydalanayotganini ta’kidladi. Shunday qilib, choralar foydalanuvchilarning asosiy qismiga ta’sir qilmaydi, ammo “YouTube” davlat “ishontirishdan aniq harakatlarga” o‘tganini ko‘radi.
Xinshteynning ta’kidlashicha, “YouTube"ning Rossiyadagi kelajakdagi taqdiri faqat platformaning o‘ziga bog‘liq.
“Agar resurs ma’muriyati o‘z siyosatini o‘zgartirmasa va qonunlarimizga rioya qilishni boshlamasa, bu yerda uni hech qanday yaxshi narsa kutmaydi. Qolaversa, muqobil platformalar (Rutube, VK Video) hozir ko‘proq rivojlanmoqda”, — dedi deputat.
Davlat Internet-provayderi “Rostelekom” iyul oyi boshida platformaning sekinlashishi boshlanganini e’lon qildi.
Rossiya prezidenti ma’muriyatiga yaqin bo‘lgan bir qancha manbalar mamlakatda “YouTube"ni butunlay blokirovka qilish rejalari haqida xabar berdi. Kreml bu da’volarni rad etdi va platformani yopish rejasi yo‘qligini izohladi.
Avvalroq “Spot” Rossiyada “YouTube"ning yangi analogi taqdim etilgani haqida yozgandi.
U “Platforma” deb nomlanib, “YouTube” interfeysini to‘liq takrorlaydi va mahalliy videolarni taklif qiladi.
