22-avgustdan to‘lov-shartnomasini olishga onlayn arizalar qabuli boshlandi. Bu haqda Oliy ta’lim, fan va innovatsiyalar vazirligi matbuot xizmati xabar berdi.
Buning uchun kontrakt.edu.uz tizimidan ro‘yxatdan o‘tib, ariza yuborish mumkin.
Arizalar oliy ta’lim muassasasi qabul komissiyasi tomonidan tasdiqlanib, QR-kodli to‘lov-shartnomasi shakllantiriladi.
Tasdiqlangan shartnomani yuklab olib, belgilangan to‘lovlarni o‘z vaqtida amalga oshirish kerak.
Bundan tashqari, shartnoma uchun arizalarni “Kontrakt Edu” mobil ilovasi orqali ham jo‘natish mumkin.
Ilovani Android hamda iOS tizimi uchun yuklab olish imkoniyati mavjud.
Iyul oyi oxirida 2024/2025-o‘quv yili uchun to‘lov-kontrakt miqdorlari tasdiqlandi. Kontrakt miqdori o‘tgan o‘quv yiliga nisbatan 15%ga oshirildi.
Eng qulay yo‘nalishlar uchun narx 6,41 mln so‘mdan 7,4 mln so‘mga oshdi. Bu yo‘nalishlarga matematika, tabiiy fanlar, jurnalistika, pedagogika, transport va atrof-muhitni muhofaza qilish kiradi. Eng “qimmat” sohalar jahon iqtisodiyoti, huquq va siyosatshunoslik bo‘ldi. Ularda o‘qitish qiymati 9,8 mln so‘mdan 11,25 mln so‘mga oshgan.
Avvalroq 2024/2025-o‘quv yili uchun oliy ta’lim muassasalariga kirish test sinovlarining yakuniy natijalari e’lon qilingandi. Undan keyin 1-kurs talabalaridan yotoqxonaga arizalar qabuli boshlandi.
