“Kaspi.kz” “Humo” to‘lov tizimining operatori bo‘lgan “Milliy banklararo protsessing markazi” ustav kapitalidagi 100% davlat ulushini sotish bo‘yicha kim oshdi savdosida ishtirok etish istagini bildirdi. Bu haqda “Forbes Kazakhstan” nashri xabar berdi. Bunga tahlilchi Timurmalik Elmuradov e’tibor qaratdi.
Tegishli xat O‘zbekiston Davlat aktivlarini boshqarish agentligining maslahatchisi sifatida faoliyat yurituvchi “Deloitte” xalqaro kompaniyasiga yuborildi.
“Biz “Humo"ning hozirgi biznes modelini ishlab chiqishni rejalashtirganmiz, uni naqd pulsiz to‘lovlar o‘sishi uchun katalizator bo‘lgan va iqtisodiy o‘sishga hissa qo‘shadigan to‘lov texnologiyalari va xizmatlarini rivojlantirish bo‘yicha katta tajribamiz bilan to‘ldiramiz”, — dedi “Kaspi.kz” bosh direktori Mixail Lomtadze.
Uning qayd etishicha, O‘zbekistonda texnologiya va xodimlarga “Humo” to‘lov xizmatlarini barcha ishtirokchilar uchun qulayroq qilish uchun katta sarmoya kiritish nazarda tutilmoqda.
Ushbu investitsiyalar natijasida “Humo” rivojlanishga qo‘shimcha turtki beradi, texnologik imkoniyatlarini kengaytiradi va ko‘pchilik uchun innovatsiyalar sohasida namuna bo‘ladi.
“Bu, o‘z navbatida, O‘zbekistonning investitsion jozibadorligini yanada oshiradi va mamlakat iqtisodiyotiga xorijiy investitsiyalarni jalb qilish uchun o‘sish haydovchisiga aylanadi”, dedi Lomtadze.
“Humo” haqida
“Milliy banklararo protsessing markazi” 2018-yilda tashkil etilgan bo‘lib, 2019-yilning bahorida u boshqarayotgan “Humo to‘lov tizimi ishga tushdi. 2021-yilda “Uzcard” bilan hamkorlik qilishga kelishib, infratuzilmani integratsiyalashni boshladi.
2023-yilning yozidan buyon 6,4 mingta “Humo” bankomatlari “Uzcard” bank kartalarini o‘zaro asosda qabul qiladi. Ayni paytda to‘lov terminallarini integratsiyalash bo‘yicha ishlar olib borilmoqda, ular allaqachon ommaviy sinovdan o‘tkazish bosqichiga yetib borgan.
Joriy yilning may oyida Milliy banklararo protsessing markazi prezident farmoniga asosan aksiyadorlik jamiyati sifatida qayta tashkil etildi. Kompaniya nominal qiymati 1000 so‘m bo‘lgan 155 mln 448 ming 748 dona oddiy aksiyalarni chiqardi va ular Davlat aktivlarini boshqarish agentligi bilan joylashtirildi.
Bungacha, aprel oyida Shavkat Mirziyoyev joriy yil uchun Davlat aktivlarini xususiylashtirish dasturini tasdiqlagan edi. Unda “Humo"ning davlat ulushini sotish ko‘zda tutilgan.
