Indoneziya “Telegram” messenjerini va “Bigo Live” striming ilovasini pornografiyani tarqatish va onlayn qimor o‘yinlarini targ‘ib qilishda ishtirok etganlikda ayblab bloklashni ko‘rib chiqmoqda. Bu haqda “Jakarta Globe” nashri xabar berdi.
Aloqa va informatika vaziri Budi Arie Setiadining ta’kidlashicha, vazirlik allaqachon ikkala platformaga ham qattiq ogohlantirishlar bergan. Biroq, “Telegram” va “Bigo Live"dan olingan javoblar yetarli emas edi.
“Men “Bigo Live” va “Telegram"ni zudlik bilan yopishni ma’qul ko‘raman, lekin jamoa birinchi navbatda ko‘proq tadqiqot o‘tkazishi kerak. Biz jamoamiz tomonidan to‘plangan dalillar asosida ishlaymiz. Agar biz pornografiya yoki qimor o‘yinlari reklamasi haqida dalillarni topsak, platformalarni blokirovka qilishga kirishamiz”, — dedi Budi Arie.
Uning ta’kidlashicha, bu “Bigo Live” tomonidan berilgan ikkinchi ogohlantirish va agar uchinchi ogohlantirish kerak bo‘lsa, vazirlik Singapur platformasini blokirovka qilishdan tortinmaydi.
Qayd etilishicha, “Bigo Live” va “Telegram"ning oldingi javoblariga qaramay, kontentni moderatsiya qilish va muammolarni hal qilishda va’da qilingan yaxshilanishlar hali amalga oshirilmagan.
Avvalroq “Spot” Turkiyada “Telegram” messenjeri bloklanishi mumkinligi haqida yozgandi.
Qayd etilishicha, Turkiya Axborot va kommunikatsiya texnologiyalari boshqarmasi (BTK) “Telegram"da noqonuniy kontent borligi haqida 1000dan ortiq ogohlantirish bergan, ammo hech qanday javob olmagan. Bu haqda “Türkiye” va “Sabah” nashrlari yozmoqda.
Gap giyohvand moddalar sotiladigan, qimor o‘yinlari, fohishalik va pedofiliya targ‘ib qilinadigan “Telegram” kanallari haqida bormoqda, deb yozadi nashrlar.
Ta’kidlanishicha, agar messenjer hech qanday chora ko‘rmasa, Turkiyada bloklanishi “ehtimoli ortib boradi”. Nashrlarda Telegram noqonuniy kontentni qaysi muddatda olib tashlashi kerakligi aniqlanmagan.
