O‘zbekistondagi IT-kurslar: o‘quv markazlari, yo‘nalishlar, manzillar va ularning narxi

E’tibor qarating: ma’lumotlar faqat tanishtirish maqsadida taqdim etildi. “Spot” narxlarni markazlarning o‘zida qayta tekshirishni tavsiya qiladi.

Najot Ta’lim

O‘quv markazdagi jami oflayn kurslar soni 10tani tashkil etadi va darslar davomiyligi 4 oydan 11 oygacha boradi. Ushbu markazdagi dasturlash darslari ikki xil shaklda o‘rgatiladi: standart va Bootcamp. Asosiy yo‘nalishlar esa dasturlash, dizayn va marketing.

Standart darslar haftasiga 3 kun, 2 soatdan davom etadi. Bu kunning asosiy qismida ish yoki o‘qish bilan band bo‘ladigan insonlar uchun.

Bootcamp darslari esa haftasiga 5 kun, 3−4 soatdan davom etadi. Asosan, bir kunda 6 soat vaqtini dars bilan shug‘ullanishga ajrata oladigan o‘quvchilarga mo‘ljallangan.

Shuningdek, darslarga 14 yoshdan 40 yoshgacha bo‘lgan yosh oralig‘idagilar qatnashishi mumkin. 40 yoshdan yuqorilar esa suhbat yoki imtihon asosida qabul qilinadi. 1 ta guruhda 18−22 nafar o‘quvchilar o‘qiydi.

Farg‘ona viloyatida minimal narx 850 ming so‘m, Toshkent shahrida 1 mln 200 ming so‘mdan boshlanadi. Narxlar filiallarga qarab o‘zgaradi.

“Najot Ta’lim” ning hozirda Toshkent shahrining Chilonzor, Shayxontohur, Olmazor tumanlarida va Urgancha shahri, Farg‘ona viloyatida filiallari ochilgan.

Bootcamp shaklidagi kurslarga quyidagilar kiradi:

1. Bootcamp foundation — ushbu kursda dasturlashni 0 dan o‘rgmoqchi bo‘lganlar qatnasha oladi. 5 oy davomida haftada 3 kun, 4 soatdan davom etadi. Bu bosqichda C va Python dasturlash tillarining asosiy nazariyalari o‘rgatiladi.
2. Bootcamp result — bu bosqichda o‘quvchi Fullstack (NodeJS + Vuejs), Frontend, Flutter Mobile va .NET (dotNet) backend yo‘nalishlaridan birini tanlab o‘qishi mumkin. Davomiyligi 6−8 oy haftada 5 kun, 4,5 soatni tashkil etadi.
3. Grafik dizayn — bootcamp va standard shaklada o‘qitiladi.

Standard shaklidagi kurslarga esa quyidagilar kiradi:

• Grafik dizayn;
• Python;
• Vue.js;
• React;
• Node.js.

“Najot Ta’lim” markazi tomonidan kursni muvaffaqiyatli tamomlagan o‘quvchilarga sertifikatlar beriladi.

IT Academy

O‘quv markazdagi jami oflayn kurslar soni 5−6ta va darslar davomiyligi 2−8 oyni tashkil etadi. Web dasturlash, Web-Design, Python va Grafik dizayn kurslari o‘qitiladi.

1. Veb-dasturlash kursida asosiy dasturlash tillari o‘rgatiladi, shuningdek zamonaviy veb-saytlarni yaratish va muvaffaqiyatli veb-ishlab chiquvchilar foydalanadigan vositalar bilan tanishish mumkin.
   Buning uchun haftada 2 soatdan 64ta dars o‘qitiladi. Narxi 1 mln 400 ming so‘m va bo‘lib to‘lash imkoniyati ham mavjud.
2. Web-Design kursida Figma grafik dasturini o‘rganish mumkin. Darslar haftada 2 martadan, 2 oy davomida o‘rgatiladi. Narxi 1 mln 400 ming so‘m.
3. Python kursida esa zamonaviy veb-ilovalar, onlayn-do‘konlar va murakkab Telegram botlarini yaratish o‘rgatiladi. Darslar haftada 2 soatdan jami 64 ta dars o‘qitiladi. Narxi 1 mln 400 ming so‘m va bo‘lib to‘lash imkoniyati ham mavjud.
4. Grafik dizayn kurslarida Photoshop, Figma Illustrator, CorelDraw kabi dasturlar bilan ishlashni o‘rganishingiz mumkin. Kurs davomiyligi 5,5 oyga mo‘ljallangan. Narxi 1 mln 400 ming so‘m.

Markazda 12−14 yoshdan 43 yoshgacha bo‘lgan qiziquvchilar o‘qishi mumkin. Akademiyaning Yunusobod, Chilonzor va Sergeli tumanlarida filiallari bor.

Shuningdek, minimal narx 1 mln 400 ming so‘mdan boshlanadi. Narxlar filiallarga qarab o‘zgaradi.

Ilmhub

O‘quv markazdagi jami oflayn kurslar soni 9ta va darslar davomiyligi 3−12 oyni tashkil etadi.

1. Foundation Programming kursida C++ dasturlash tili, Basics, OOP, Linux OS va boshqa bilimlar o‘rgatiladi. Kurs davomiyligi 4 oy, haftada 2 soatdan 3 marotaba o‘qitiladi. Oflayn kurs narxi 790 ming so‘m va onlayn kurs narxi 490 ming so‘mni tashkil etadi.
2. .NET Bootcamp kursida dastlabki 1−2 oy C# dasturlash tili OOP konsepsiyalari bilan birga mukkammal tarzda o‘rgatiladi. Unda keyin esa .NET texnologiyasi boshlanadi va API lar bilan ishlash ham o‘qitiladi. Kurs davomiyligi 7 oy, haftada 4 soatdan 5 marotaba o‘qitiladi. Oflayn kurs narxi 2 mln 190 ming so‘m va onlayn kurs narxi 1 mln 590 ming so‘mni tashkil etadi.
3. .NET Backend kursida Foundation kursini tamomlagan o‘quvchilar string, shart va sikl operatorlari, array, list, queue, stack kabi tushunchalarning c# tilida qanday tadbiq etilishini o‘rganadilar. Kurs davomiyligi 5 oy, haftada 2 soatdan 3 marotaba o‘qitiladi. Oflayn kurs narxi 1 mln 190 ming so‘m va onlayn kurs narxi 790 ming so‘mni tashkil etadi.

Shuningdek, AI Bootcamp, Flutter Cross-platform, Python Beginner, Arduino & Robototexnika, Scratch, React Native, iOS Mobile (Swift) va Python Backend kabi kurslar ham bor.

Minimal narx 490 ming so‘m, maksimal narx 1 mln 190 ming so‘mni tashkil etadi.

Markazda 7 yoshdan yuqori bo‘lgan qiziquvchilar o‘qishi mumkin. Toshkent shahri va Namangan viloyatida filiallari bor.

PROWEB

O‘quv markazdagi jami oflayn kurslar soni 16 ta va darslar davomiyligi 2−8 oy, 1,5−3 soatni tashkil etadi. Web dasturlash, PRO Design va Internet Marketing, Python, 3DS Max va AUTOCAD, Motion Design & Video Montaj singari kurslar o‘qitiladi.

WEB Dasturlash kursida:

• Web-sahifalarni yaratish asoslari (Visual studio, HTML, Figma va CSS);
• Kodning to‘g‘ri tuzilishi — BEM, loyihalarni xavfsiz saqlash va portfolioni Git tizimi yordamida bulutli xizmatlarga (GitHub va boshqalar) yuklash;
• Eng moslashuvchan JavaScript dasturlash tilini to‘liq o‘rganish;
• React kutubxonasi bilan tanishish va uning asoslari;
• Type Script;
• SASS, Pug va Webpack.

PRO Design kursida:

• Photoshop, Illustrator, Figma, CorelDRAW dasturlarini o‘rganish;
• Web-dizayn asoslari, UI / UX;
• Brending va poligrafiya;
• Mobil ilovalarning dizayni;
• Portfolioni boyitish;
• Bitiruv loyihasi.

Python kursida:

• Python asoslari;
• Ma’lumotlar bazasi va kutubxonalar (SQL);
• Telegram botlar;
• Onlayn-do‘konlar.

Shuningdek, minimal narx 1 mln 150 ming so‘m, maksimal narx 2 mln 225 ming so‘mni tashkil etadi. Onlayn va oflayn kurs narxlari farq qiladi.

Darslarni muvaffaqiyatli tugatganlarga sertifikat va diplom topshiriladi va markazda 13 yoshdan boshlab o‘qish mumkin. Hozirda Chilonzor va Mirobod tumanlarida filiallari mavjud.

PDP Academy

PDP — bu oflayn va onlayn ta’lim shakliga ega IT Akademiya bo‘lib, 7 yildan buyon mahalliy va xalqaro IT kompaniyalarga dasturchilar tayyorlaydi. Markazdagi oflayn kurslar 2ga bo‘lingan bo‘lib, dastlab 2,5 oylik dasturlash asoslari boshlang‘ich “Foundation” kursi o‘qitiladi. Uni tugatib talabalar imtihon topshirib asosiy mutaxassislik kurslariga o‘tishadi. Bu kurslar 9−10 oy davom etadi va 15 yoshdan yuqori bo‘lgan yoshlat ta’lim olishlari mumkin.

Mutaxassislik kurslari standart va intensiv shaklda bo‘lib, dasturlashning 5 ta yo‘nalishida o‘qitiladi. Bular:

• Java backend
• .NET backend
• Python backend
• Frontend (React.JS)
• Mobile (Flutter development)

O‘quv markazdagi darslar davomiyligi 3−4 soat davom etadi.

Shuningdek, minimal narx 600 ming so‘m, maksimal narx 2 mln 850 ming so‘mni tashkil etadi.

Hozirda markaz Toshkent shahri Shayxontohur tumanida faoliyat yuritmoqda.

UAcademy

O‘quv markazdagi jami kurslar soni 9 tani tashkil etadi va darslar 2−6 oy davomida olib boriladi. Foundation, Mobile, AI, IT Project Manager, Backend singari kurlar mavjud.

• Foundation kursi 2 oy davomida haftada 5 marta 4 soatdan o‘qitiladi. Dars davomida HTML, CSS, Java Script, Nodejs va ExpressJS bo‘yicha boshlang‘ich bilimlar beriladi.
• Mobile kursi 4 oy davomida haftada 5 marta 4 soatdan o‘qitiladi. Kursda mobil ilovalarni ishlab chiquvchi mobil qurilmalarda ilovalarni yaratish, sinab ko‘rish va ishlab chiqish ko‘nikmalaridan foydalanadi. Ular iOS va Android kabi mashhur operatsion tizim muhitlarida ishlaydi va ilovalarni yaratishda ko‘pincha UI va UX tamoyillarini hisobga oladi.

Shuningdek, minimal narx 2 mln so‘m, maksimal narx 15 mln so‘mni tashkil etadi.

Markaz hozirda Yunusobod tumanida faoliyat yuritmoqda.

Bobir Akilkhanov Tech Academy

“Bobir Akilkhanov Tech Academy” bir necha yillardan beri IT sohasida mutaxassislar tayyorlaydi. Kurslar amaliy mashg‘ulotlarga asoslangan bo‘lib, biz nafaqat dasturlash tillarini, balki murakkab tizimlarni ishlab chiquvchi kasbi ham o‘rgatiladi.

O‘quv markazdagi jami kurslar soni 4 tani tashkil etadi va darslar 9 oy davomida 3 modulda olib boriladi. Python, Sun’iy intellekt, grafik dizayn, .NET Web developer singari kurslar mavjud.

• Python kursida Python, Django va boshqa ko‘plab veb-texnologiyalar yordamida veb-sayt yaratish bo‘yicha bilimlar beriladi. 9 oy uchun kurs narxi 21 mln 500 ming so‘mni tashkil etadi.
• Sun’iy intellekt kursida Python tilini o‘rganish, Data Science, Database, sun’iy intellektga asoslangan tayyor dasturiy ta’minotni yaratish va ular bilan ishlash o‘rgatiladi. 9 oy uchun kurs narxi 21 mln 500 ming so‘m.

Har bir modul 3 oydan iborat va modul yakunida imtihon qilinadi. Imtihondan o‘tgan talabalar keyingi modulda o‘qishni davom etishadi. Darslar haftada 3 marotaba 2 soatdan bo‘ladi.

Shuningdek, minimal narx 5 mln so‘m, maksimal narx 7 mln so‘mni tashkil etadi. Darslar modullarga bo‘lingan holda olib boriladi.

Undan tashqari yaxshi o‘qigan talabalarga loyihalarda amaliyot taqdim qilinadi va ishga kirishda yordam beriladi. Hozirda markaz Toshkent shahri Milliy universitetiga yaqin hududda joylashgan.

Unicorn

O‘quv markazdagi jami kurslar soni 9tani tashkil etadi va darslar 4−7 oy davomida olib boriladi. Backend Node Js, Foundation C++, Foundation Python, Front-end, Mobile Java, IT Kids | Bolalar uchun, Kompyuter savodxonligi va UI/UX dizayni kurslar mavjud.

• Frontend kursida HTML,CSS (1 oy), Bootstrap,SASS-static (1 oy), JavaScript (1 oy), React js (2 oy) bo‘yicha bilimlar o‘rgatiladi.
• Android and IOS Development kursida esa Android Studio, Fragments, Broadcast va FireBase o‘qitiladi.

Shuningdek, minimal narx 1 mln 200 ming so‘m, maksimal narx 1 mln 500 ming so‘mni tashkil etadi.

Hozirda markaz Toshkent shahri Mirzo Ulug‘bek tumanida joylashgan.

FinTechHub

Markaz kompyuter dasturlari va startap loyihalarni ishlab chiqaradigan IT laboratoriya hisoblanadi. O‘quv markazdagi jami kurslar soni 2ta onlayn va 5ta oflaynni tashkil etadi va darslar 3−8 oy davomida olib boriladi. Frontend, Backend va Mobile Flutter singari onlayn va oflayn kurslar mavjud.

• Frontend kursida hozirgi kundagi eng oxirgi texnologiyalar aynan “FinTechHub” laboratoriyasida o‘qitiladi. Haftasiga 3 kun davomida, 2 soatdan mashg‘ulotlar olib boriladi. Guruhga 12 o‘quvchi qabul qilinadi va narxi 1 mln 500 ming so‘m.
• Backend dasturlash kursi onlayn “Zoom"da o‘tkaziladi. Guruhga 12 o‘quvchi qabul qilinadi va dars vaqti 2 soat. Narxi esa oyiga 900 ming so‘m.

Shuningdek, minimal narx 900 ming so‘m, maksimal narx 1 mln 500 ming so‘mni tashkil etadi.

Hozirda markaz Toshkent shahri Mirobod tumanida faoliyat yuritmoqda.