Shavkat Mirziyoyev 18-sentabr kuni Rossiya delegatsiyasi bilan transport kommunikatsiyalarini rivojlantirish masalalari bo‘yicha muzokaralar o‘tkazdi, deya xabar berdi prezident matbuot xizmati.
Yig‘ilishda Bosh vazir o‘rinbosari Vitaliy Savelyev, Rossiya prezidenti maslahatchisi Igor Levitin va “Rossiya temir yo‘llari” rahbari Oleg Belozerov ishtirok etdi.
Tomonlar Vladimir Putinning may oyidagi tashrifi chog‘ida erishilgan kelishuvlarni amalga oshirish jarayonini ko‘rib chiqdilar.
Uchrashuvda transport sohasida sanoat kooperatsiyasi loyihalarini jadallashtirish va muhandis kadrlar tayyorlash masalalari muhokama qilindi. Hududiy transport yo‘laklarini rivojlantirish bo‘yicha chora-tadbirlarni muvofiqlashtirishga alohida e’tibor qaratildi.
Shuningdek, Rossiya delegatsiyasi O‘zbekiston bosh vaziri Abdulla Aripov va transport vaziri Ilhom Maxkamov bilan ham uchrashdi. Infratuzilma tashabbuslarini amalga oshirish, logistika xizmatlarini kengaytirish, raqamlashtirish masalalari muhokama qilindi.
24-sentabrdan Toshkent-Moskva poyezdlari qatnovi qayta tiklanadi, dekabrdan esa haftasiga ikki marta qatnaydi. Bundan tashqari, turistik poyezdlar uchun yo‘nalish variantlari ham ko‘rib chiqilmoqda.
Muntazam “Agroekspress” muzlatgichli konteyner poyezdlarini yo‘lga qo‘yish ustida ish olib borilmoqda, ularning birinchisi Toshkentga 2021-yilning noyabr oyida yetib kelgan. Yaqin vaqt ichida O‘zbekistonda “Rossiya temir yo‘llari"ning vakolatxonasi ochilishi kerak.
Tashrif yakunlari bo‘yicha Bosh vazir o‘rinbosari Savelyev “transport sohasida hamkorlikni yanada mustahkamlashdan” ikki tomonlama manfaatdorligini qayd etdi.
Markaziy Osiyoning eksport-import va tranzit imkoniyatlarini kengaytirishga qaratilgan loyihalarni amalga oshirish rejalashtirilgan.
Avvalroq “Spot” vagon zavodlarini modernizatsiya qilishga $30 mln ajratish rejalashtirilayotgani haqida yozgandi.
O‘zbekiston temir yo‘llari lokomotiv parkini 2033-yilgacha bosqichma-bosqich yangilash belgilangan.
