Pavel Durov “Telegram"da qidiruv xavfsizligini kuchaytirish va maxfiylik siyosatini yangilash haqida ma’lum qildi. Bu haqda u “Telegram"dagi kanalida yozgan.
Messenjer o‘zining foydalanish shartlari va maxfiylik siyosatini yangilab, ularni barcha hududlar uchun bir xil qilib qo‘ydi.
Durov platforma qoidalari buzilgan taqdirda, foydalanuvchilarning IP manzillari va telefon raqamlari so‘rovlar bo‘yicha vakolatli organlarga o‘tkazilishi mumkinligini ma’lum qildi.
Uning qayd etishicha, bu chora-tadbirlar qariyb milliard foydalanuvchini suiiste’mol va noqonuniy harakatlardan himoya qilishga qaratilgan.
“Telegram” shuningdek, qidiruvdagi kontentni filtrlashni yaxshiladi, bundan avval taqiqlangan tovarlarni tarqatish uchun foydalanilgan.
Sun’iy intellektning integratsiyasi tufayli barcha aniqlangan noqonuniy kontent qidiruv natijalaridan olib tashlandi. Foydalanuvchilar qonunbuzarliklar haqida @SearchReport maxsus boti orqali xabar berishlari mumkin.
Biroq Rossiya va Markaziy Osiyo mamlakatlari, jumladan, o‘zbekistonlik foydalanuvchilar allaqachon ushbu bot mintaqada mavjud emasligi haqida xabar berishgan. “Spot” muxbiri bunga amin bo‘ldi.
Avvalroq “Telegram” asoschisi Pavel Durov birinchi marta Parijda hibsga olingani haqida izoh berdi.
Qayd etilishicha, u Parijga kelganidan so‘ng uni to‘rt kun davomida politsiya so‘roq qilingan va Durovga messenjerdan noqonuniy foydalanish uchun shaxsan javobgar bo‘lishi mumkinligi aytilgan, chunki Fransiya rasmiylari “Telegram"dan javob olmagan.
Hibsga olish, so‘roq qilish va da’volar Durov uchun “hayratlanarli” bo‘lgan, chunki “Telegram"ning Yevropa Ittifoqida vakili bor. Elektron pochta manzili har qanday Yevropa Ittifoqi rezidenti uchun mavjud.
“Fransiya hukumati yordam so‘rash uchun men bilan bog‘lanishning ko‘plab usullariga ega edi. Men Fransiya fuqarosi sifatida Dubaydagi Fransiya konsulligida tez-tez mehmon bo‘lib turardim. Biroz oldin men shaxsan ularga Fransiyadagi terrorizm tahdidiga qarshi kurashish uchun „Telegram“ orqali ishonch telefonini ochishga yordam berganman”, — degan Durov.
Agar mamlakat internet xizmatidan norozi bo‘lsa, o‘rnatilgan amaliyotga ko‘ra, ushbu xizmatning o‘ziga qarshi sud jarayoni boshlanadi.
Durov bosh direktorni u boshqarayotgan platformada uchinchi shaxslar tomonidan sodir etilgan jinoyatlarda ayblash uchun smartfondan oldingi davr qonunlaridan foydalanish xato yondashuv deb hisoblaydi.
Hech bir innovator, agar ular ushbu vositalarni suiiste’mol qilish uchun shaxsan javobgar bo‘lishlarini bilsalar, hech qachon yangi vositalarni yaratmaydilar.
“Maxfiylik va xavfsizlik o‘rtasidagi muvozanatni” topish oson emas, ammo messenjer “muloqotga tayyor”. Va agar “Telegram” bu borada biron bir davlat regulyatorlari bilan kelisha olmasa, messenjer mamlakatni tark etishga tayyor, deya qo‘shimcha qildi Durov.
U Rossiyada kuzatuvni ta’minlash uchun “shifrlash kalitlari"ni berish so‘ralganida, bu rad etilganini, natijada “Telegram” Rossiyada taqiqlanganini eslatib o‘tdi.
“Biz prinsiplarimizgaa mos kelmaydigan bozorlarni tark etishga tayyormiz, chunki biz buni pul uchun qilmayapmiz”, — deya qayd etgan Durov.
Durovning ta’kidlashicha, bularning barchasi “Telegram” mukammal degani emas. Hatto so‘rovlarni qayerga jo‘natish borasida rasmiylar chalkashib ketishi mumkinligi ham biz yaxshilashimiz kerak bo‘lgan narsadir.
Ammo ba’zi ommaviy axborot vositalarida “Telegram” qandaydir anarxik jannat ekanligi haqidagi da’volar mutlaqo noto‘g‘ri.
Qayd etilishicha, messenjer har kuni millionlab zararli postlar va kanallarni o‘chirib tashlaydi. Shuningdek, har kuni shaffoflik hisobotlarini nashr etiladi.
Shoshilinch moderatsiya so‘rovlarini tezroq ko‘rib chiqish uchun NNTlar bilan bevosita ishonch telefonlari mavjud.
“Biroq, bu yetarli emas, degan ovozlarni eshitamiz. „Telegram“ foydalanuvchilari sonining keskin o‘sishi 950 mlnga yetgani jinoyatchilar uchun bizning platformamizni suiiste’mol qilishni osonlashtirgan og‘riqni kuchaytirdi”, — dedi Pavel Durov.
Durovning qo‘shimcha qilishicha, u boradagi ishlarni sezilarli darajada yaxshilashni o‘z oldimga shaxsiy maqsad qilib qo‘ygan va bu jarayon allaqachon ichkarida boshlangan.
U tez orada jarayonlar haqida batafsil ma’lumot berishini qayd etib o‘tgan.
