“Yandex Cup” yettinchi xalqaro dasturlash chempionatiga arizalar qabul qilinmoqda. Bu haqda “Yandex” matbuot xizmati “Spot"ga xabar berdi.
Turnirning joriy yilgi sovrin jamg‘armasi 1,75 mlrd so‘mga ($135 ming) oshirildi. 2023-yil bu $81,2 mingni tashkil etgandi.
Unda o‘zbekistonlik dasturchilar ham quyidagi 6ta yo‘nalish bo‘yicha ishtirok etishlari mumkin:
- tahlil;
- frontend ishlab chiqish;
- bekend ishlab chiqish;
- mobil ishlab chiqish;
- mashinali o‘rganish;
- sport dasturlashga bag‘ishlangan “Algoritm” yo‘nalishi.
Qatnashchilar bir nechta yo‘nalishda o‘z kuchlarini sinab ko‘rishlari mumkin, lekin yarim finalga kelganda eng mos yo‘nalishni tanlashlari kerak.
“Yandex Cup 2024” uchta bosqichdan iborat bo‘lib, saralash 14−20 oktabr kunlari, yarim final esa 2-noyabr kuni onlayn tarzda bo‘lib o‘tadi. Oflayn final bosqichi hamda ishtirokchilarni taqdirlash marosimi 2−6 dekabr kunlari Toshkentda o‘tkaziladi.
Joriy yilgi musobaqada “Gold-final” bosqichi ham tashkil etildi hamda unda strim g‘oliblari, shuningdek “Yandex” xodimlari har bir yo‘nalish bo‘yicha mutlaq chempion unvoni uchun kurashadi.
Musobaqada ishtirok etish uchun nomzodlar joriy yilning 20-oktabrigacha havola orqali ariza jo‘natishlari kerak.
G‘oliblar pul mukofotlari bilan taqdirlanadi. Har bir yo‘nalishda eng yaxshi natija ko‘rsatgan ishtirokchilar “Yandex"da soddalashtirilgan tartibda suhbatdan o‘tish imkoniyatiga ega bo‘lishadi.
Musobaqa qoidalari bilan bu yerda tanishish mumkin. Batafsil ma’lumotlarni havola orqali olish imkoniyati mavjud.
Avvalroq “Ijodiy startaplar tanlovi"ga arizalar qabul qilinayotgani haqida xabar berilgandi.
